नवी दिल्ली - दिल्लीतील केजरीवाल सरकारमधील (Kejriwal Government) दोन मंत्री मनीष सिसोदिया (Manish Sisodia) आणि सत्येंद्र जैन (Satyendra Jain) यांनी पदाचा राजीनामा दिलाय. मुख्यमंत्री केजरीवाल यांनी दोघांचा राजीनामा स्वीकारला आहे. त्यातच भाजपने आम आदमी पक्षावर जोरदार हल्लाबोल केला आहे.

मनीष सिसोदिया आणि अरविंद केजरीवाल यांनी अण्णा हजारे यांच्या प्रामाणिक आंदोलनाचा वारसा बदनाम केल्याचे भाजप नेते रविशंकर प्रसाद यांनी म्हटले आहे. तुम्ही शाळा उघडणार असे सांगितले होते आणि तुम्ही दारूचे दुकान उघडत आहात. जो शिक्षण मंत्री आहे तो मद्य मंत्री देखील आहे असे भारतात कुठेच नाही, असा दावाही प्रसाद यांनी केला आहे.

भाजप नेते प्रसाद म्हणाले की, पूर्वी असे वाटत होते की कपात आणि कमिशन हा एकाच पक्षाचा वारसा आहे. आता #C अर्थात कपात, कमिशन आणि भ्रष्टाचार केजरीवालजींच्या पक्षासाठीही असल्याचं ते म्हणाले. दारूतून अधिक नफा मिळविण्यासाठी आणखी किती खालच्या पातळीला जाल? असा सवाल करत अनेक नेते तुरुंगात असून त्यांना जामीन मिळालेला नाही, रविशंकर प्रसाद म्हणाले.