महागाई आणि बेरोजगारीविरोधात काँग्रेसतर्फे देशभरात निषेध केला जात असून, आज सकाळी काँग्रेस नेते राहुल गांधी यांनी पत्रकार परिषद घेऊन मोदी सरकारवर जोरदार निशाणा साधला होता. ज्यात त्यांनी लोकशाही नष्ट झाल्याचे म्हणत जो आवाज उठवतो त्याच्या मागे ईडी लावली जाते असा घणाघात राहुल यांनी केला होता. या आरोपांनंतर भाजपकडून रविशंकर प्रसाद यांनी पुढाकार घेत काँग्रेसला घेरण्याचा प्रयत्न केला. यावेळी त्यांनी काँग्रेसमध्ये लोकशाही आहे का? असा प्रश्न उपस्थित करत आणीबाणीचा संदर्भ दिला आहे.

राहुल गांधींनी उपस्थित केलेल्या प्रश्नांवर उत्तर देताना रविशंकर प्रसाद म्हणाले की, राहुल गांधींच्या आजीने मीडियावर बंदी घातली होती. हे लोक आपल्याला लोकशाहीचा सल्ला देतात. राहुल गांधीजी कृपया एका प्रश्नाचे उत्तर द्या तुमच्या पक्षात लोकशाही आहे का? काँग्रेसमध्ये चांगले नेते आहेत, पण सोनियाजी, राहुलजी आणि प्रियंकाजी यांचा स्वतःचा पक्ष आहे. लोकांनी तुम्हाला नाकारले आहे, मग त्याला आम्ही जबाबदार कुठून? असा सवाल रविशंकर प्रसाद यांनी उपस्थित केला.

राहुल गांधी म्हणतात की, ते नेहमी खरे बोलतात. तर मग ते पण तो जामिनावर का चालले आहे असा प्रश्न आम्हाला विचारायचे आहे. नॅशनल हेराल्डचे प्रकरण काय आहे हे आज देशाला सांगण्याची गरज आहे. हे संपूर्ण प्रकरण भाजप सरकार येण्यापूर्वीचे असल्याचे रविशंकर प्रसाद म्हणाले. राहुल गांधी आता देशावर टीका करत आहेत. आपला राजकीय स्वार्थ आणि भ्रष्टाचार टाळण्यासाठी ते देशातील संस्थांची बदनामी करत असल्याचेही ते म्हणाले.

यावेळी रविशंकर प्रसाद यांनी कलम 370 चाही उल्लेख केला. आज कलम 370 रद्द करण्यात आले आहे. आज काश्मीरमध्ये तिरंगा फडकत असून जल्लोष व्यक्त केला जात असताना काँग्रेसवाले हिटलरबद्दल बोलत आहे. पण या संपूर्ण देशाने आणीबाणीच्या वेळी हुकूमशाही पाहिली असल्याची आठवण रविशंकर प्रसाद यांनी राहुल गांधींना करून दिली.