एका कुत्र्याच्या उपचारात हलगर्जीपणा केल्याचा आरोप करत भाजप खासदार मेनका गांधी यांनी एका पशुवैद्यकीय डॅाक्टराला शिवीगाळ केल्याची ऑडिओ क्लिप व्हायरल झाली आहे. या क्लिपवरुन सोशल मीडियात चर्चा रंगली आहे. मध्य प्रदेशमधील भाजप आमदारानेही मेनका गांधी यांच्या व्हायरल ऑडिओ क्लिपवर नाराजी व्यक्त करत टीकास्त्र सोडलं आहे. मेनका गांधी भाजप खासदार असल्याची लाज वाटतेय, असं ट्विट भाजप आमदार अजय विष्णोई यांनी केलं आहे.

मध्य प्रदेशचे विद्यमान आमदार आणि माजी मंत्री अजय विष्णोई यांनी शनिवारी ट्विट करत मेनका गांधी यांच्यावर टीकास्त्र सोडलं. ट्विटमध्ये अजय विष्णोई म्हणाले की, 'खासदार श्रीमती मनेका गांधी यांनी पशुवैद्य डॉ. विकास शर्मा यांच्याशी केलेल्या वक्तव्यामुळे जबलपूर पशुवैद्यकीय महाविद्यालयाची किंमत कमी होत नाही, किंवा त्याची पातळी घसरत नाही. परंतु यामुळे मेनका गांधी अत्यंत निंदनयी (घटिया) महिला असल्याचे सिद्ध होते. त्या माझ्या पक्षाचा खासदार (नेता नाही) आहेत, याची मला लाज वाटतेय.'

मेनका गांधी यांच्यावर पशुवैद्यकीय डाँक्टरांनी नाराजी व्यक्त केली आहे. मेनका गांधांचा निषेध, बायकॉट मेनका गांधी असा ट्रेड टि्वटवर सुरु झाला. सोशल मीडियावर नेटकऱ्यांनी त्यांच्यावर संताप व्यक्त केला आहे. मेनका गांधी यांनी या प्रकरणावर माफी मागावी, असं नेटकऱ्यांनी म्हटलं आहे. नेटकरी टि्वटवर 'मेनका गांधी माफी मागा' या हॅशटॅगसोबत आँडियो क्लिपही शेअर करीत आहेत.

काय आहे हे प्रकरण

दिल्लीतल्या अंजली चौधरी यांच्या कुत्र्याच्या पायाचे आँपरेशन डॉ. विकास शर्मा यांनी केलं. ऑपरेशननंतर कुत्र्याच्या पायाला घातलेले टाके तुटल्याची तक्रार आली आहे. त्यानंतर मेनका गांधी या डॉ. शर्मा यांच्यावर भडकल्या. त्यांनी डॅा. शर्मा यांना फोन करुन शिवीगाळ केली. तसेच पशुवैद्यकीय डॉक्टराची पदवी रद्द करण्याची धमकी दिली आहे. तसेच हरामी, हरामजादे असे शब्द वापरल्याचे क्लिपवरुन दिसते.