नवी दिल्ली : भारतीय जनता पक्षाच्या‌ राष्ट्रीय पदाधिकाऱ्यांची बैठक आज दिल्लीत सुरु झाली. देशभरात भाजप कार्यकर्त्यांची बांधणी करण्याबरोबरच आगामी काळातील निवडणुकांसाठी रणनीती या बैठकीत आखली जाणार आहे.

दिल्लीतील पक्षाच्या मुख्यालयात भाजपचे राष्ट्रीय अध्यक्ष जे. पी. नड्डा यांच्या अध्यक्षतेखाली ही बैठक होत आहे. बी.एल. संतोष, महाराष्ट्रातून विनोद तावडे, पंकजा मुंडे, तसेच दुष्यंत गौतम, अरविंद मेनन, अनिल बलुनी, दिलीप घोष, अनुपम हाजरा, बैठकीत सहभागी होण्यासाठी आले आहेत.

जेपी नड्डा भाजपच्या सर्व राष्ट्रीय पदाधिकाऱ्यांना आणि पक्षाच्या मोर्चा प्रमुखांना केंद्र सरकारच्या यशाची माहिती, पाच राज्यांच्या आगामी विधानसभा निवडणुकीपूर्वी लोकांपर्यंत नेण्यासाठी मार्गदर्शन करीत आहे. याद्वारे भाजप आगामी निवडणूक प्रचाराला प्रारंभ करीत असल्याचे मानले जात आहे.

दिवसभर चालणाऱ्या या बैठकीबाबत पक्षाचे नेते रमणसिंह म्हणाले, "आगामी निवडणुकांसाठी रणनीती या बैठकीत आखली जाणार आहे. यापूर्वी पंतप्रधानांनी पदाधिकाऱ्यांबरोबर दीर्घ चर्चा केली. त्यानुसार बैठकीत धोरणे आखली जातील. धोरणांची अंमलबजावणी कशी करायची हेही निश्चित होणार आहे."

‌विरोधी पक्ष कोविड काळात भीतीचे वातावरण निर्माण केले. पण केंद्राने सामान्य लोकांपर्यंत अन्य धान्य पोचविले याबद्दल सुरवातील जे. पी. नड्डा यांनी बैठकीत दिली. जनतेचे सेवाकार्य हे अशाच पद्धतीने सुरू ठेवण्याबाबत त्यांनी मार्गदर्शन केले. काँग्रेसला १९६७ पासून उतरती कळा लागली आहे. त्याचे कारण कार्यकर्ते सक्रीय राहिले नाहीत. त्यांना एकसंध ठेवणारा कार्यक्रम पक्षाकडे राहिला नाही. भाजपने मात्र सातत्याने कार्यकर्त्यांना एकसंध ठेवत पक्षाला मजबूत ठेवले. यापुढील काळातही पक्ष कार्यकर्त्यांची बांधणी करणार असल्याचे त्यांनी सांगितले.