कोलकाता : ममता बॅनर्जींबरोबर कोण आहेत? आता त्या महाराष्ट्रात गेल्या आहेत. ही चांगली बाब आहे. बंगालमध्ये जो हिंसा आणि हत्येचे राजकारण होत आहे. त्याचे पाप धुण्यासाठी त्यांना संधी हवी, असा टोला भारतीय जनता पक्षाचे (BJP) राष्ट्रीय उपाध्यक्ष दिलीप घोष (Dilip Ghosh) यांनी मुख्यमंत्री ममता बॅनर्जी (CM Mamata Banerjee Visit Mumbai) यांना लगावला आहे. ते प्रसारमाध्यमांशी बोलत होते. घोष पुढे म्हणाले, मला नाही वाटत की त्यांना कोणताही मोठा नेता भेटलं. सर्व नेत्यांनी त्यांच्यापासून अंतर राखले आहे. ममता बॅनर्जी सगळ्यांवर वर्चस्व गाजविण्याचे राजकारण करित आहेत. त्या गोवा, हिमाचल किंवा उत्तर प्रदेश कुठेही गेल्या तरी त्यांना त्याचा काहीच फायदा मिळणार नाही. बंगालला लुटून पूर्ण देशात तृणमूल काँग्रेस पक्षाचा (Trinmool Congress) विस्तार करण्याचा जो प्रयत्न सुरु आहे, त्याने बंगालचे लोक आनंदी नाहीत, असा आरोप दिलीप घोषण यांनी बॅनर्जी यांच्यावर केला आहे.

ममता बॅनर्जी या दोन दिवसांच्या महाराष्ट्र दौऱ्यावर आल्या आहेत. मंगळवारी (ता.३०) त्यांचे मुंबईत आगमन झाले. मुख्यमंत्री उद्धव ठाकरे तब्येतीच्या कारणामुळे बॅनर्जी यांना भेटू शकले नाहीत. पर्यटनमंत्री आदित्य ठाकरे आणि शिवसेनेचे नेते संजय राऊत यांनी त्यांची भेट घेऊन चर्चा केली. आज बुधवारी (ता.एक) त्या राष्ट्रवादीचे प्रमुख शरद पवार यांची भेट घेत आहेत. पश्चिम बंगाल बाहेर तृणमूलचा विस्ताराचा एक भाग म्हणून बॅनर्जी यांच्या दौऱ्याकडे पाहिले जात आहे.