नवी दिल्ली : देशात काही दिवसांपूर्वीच प्रदर्शित झालेल्या द काश्मीर फाईल्स चित्रपटावरून राजकारण तापलेले असताना, यात आता दिल्लीचे मुख्यमंत्री अरविंद केजरीवाल यांनीदेखील उडी घेतली आहे. द काश्मीर फाइल्स राज्यात करमुक्त करण्याच्या मागणीवरून भाजपावर हल्ला चढवत ते म्हणाले की, ‘द काश्मीर फाइल्स चित्रपट करमुक्त करण्याऐवजी भाजपाने चित्रपटाचे दिग्दर्शक विवेक अग्नीहोत्री यांना तो युट्युबवर अपलोड करण्यास सांगावे, असा सल्ला दिला आहे. राजधानीतही 'द काश्मीर फाईल्स' करमुक्त करण्याची मागणी केली. याला प्रत्युत्तर देताना मुख्यमंत्री अरविंद केजरीवाल वरील सल्ला दिला आहे.

"काश्मिरी पंडितांच्या नावावर काही लोकांनी करोडोंची कमाई केली आहे आणि तुम्ही फक्त पोस्टर लावत आहात," असे केजरीवाल विधानसभेत भाजपला उद्देशून म्हणाले. द काश्मीर फाइल्स हा चित्रपट बिहार, मध्य प्रदेश, हरियाणा, उत्तर प्रदेश, गुजरात, त्रिपुरा, गोवा आणि उत्तराखंडसह अनेक राज्यांमध्ये करमुक्त करण्यात आला आहे.

दरम्यान, ‘द काश्मीर फाइल्स चित्रपट करमुक्त करण्याऐवजी तो युट्युबवर अपलोड करावा सर्वांना मुक्तपणे पाहता येईल. त्यामुळे हा चित्रपट करमुक्त करण्याची गरजच काय? असे म्हणत, विवेक अग्निहोत्रींनी हा चित्रपट युट्युबवर अपलोड केल्यास सर्वजण तो एका दिवसात पाहू शकतील, असेही केजरीवाल म्हणाले.