गाझीयाबाद: भाजप कार्यकर्ते आणि आंदोलक शेतकरी यांच्यामध्ये आज दिल्ली आणि उत्तरप्रदेश सीमेवर जोरदार राडा झाला. येथे भाजप कार्यकर्त्यांनी एका नेत्याच्या स्वागतासाठी भव्य मिरवणूक काढली होती. दिल्ली-मेरठ एक्स्प्रेसवेवर दुपारी बाराच्या सुमारास हा मार्च आणि आंदोलक शेतकरी आमनेसामने आल्याने तणाव निर्माण झाला होता. यावेळी आंदोलक शेतकरी आणि भाजप कार्यकर्त्यांमध्ये लाठ्याकाठ्यांनिशी जोरदार हाणामारी झाली. या राड्यामध्ये दोन्ही बाजूंकडील लोक मोठ्या संख्येने जखमी झाल्याची माहिती सूत्रांनी दिली. भाजपचे स्थानिक नेते अमित वाल्मीकी यांच्या स्वागतासाठी ही मिरवणूक काढण्यात आली होता. यावेळी शेतकरी आंदोलकांनी जोरदार दगडफेक करत वाल्मीकी यांच्या ताफ्यातील अनेक वाहनांची मोडतोड देखील केली. दुसरीकडे शेतकरी नेत्यांनी मात्र आमच्या आंदोलनाला जाणीवपूर्वक बदनाम करण्यासाठी भाजपकडून हे कारस्थान आखण्यात आले असल्याचा आरोप केला आहे.

भारतीय किसान युनियनने यासंदर्भात ट्विटरवर म्हटलंय की, भाजप कार्यकर्त्यांनी आज गाझीपूर बॉर्डरवरील फ्लायवेवर मोठ्या संख्येने एकत्र येत कुणा नेत्याच्या स्वागताच्या बहाण्याने ढोल वाजवत आंदोलनाच्या विरोधात घोषणाबाजी केली. आंदोलकांनी त्यांना हुसकावल्यानंतर त्यांच्यावरच लाठी-काठ्यांनी हल्ला चढवला गेला. भाजप आता आंदोलनाला हिंसक मार्गाने थांबवू इच्छित आहे. आज गाझीपूर बॉर्डरवर भाजप कार्यकर्त्यांद्वारे केलेली हिंसा याचंच उदाहरण आहे. सगळ्या शेतकरी नेत्यांना विनंती आहे की त्यांनी आपल्या आंदोलनाला वाचवावं.

तर दुसरीकडे भाजपने असा दावा केला आहे की, त्यांच्यावर या आंदोलकांनी दगडफेक केली. तर शेतकरी नेते राकेश टिकैत यांनी दावा केलाय की, शेतकऱ्यांसोबत झालेल्या या घटनेला भाजपच जबाबदार आहे. हा भाजपचाच कट होता, असंही त्यांनी म्हटलंय.