नवी दिल्ली : समलैंगिक संबंध गुन्हा नसल्याचे सर्वोच्च न्यायालयाने स्पष्ट केल्यानंतर दिग्दर्शक करण जोहर याने हा ऐतिहासिक निर्णय असल्याचे म्हटले आहे. या निर्णयामुळे मानवता आणि समान हक्कांचा विजय झाला असून, आज देश खऱ्या अर्थाने जगू लागला आहे असे त्याने ट्विट केले आहे.

समलैंगिक संबंध कायदेशीर का बेकायदा, याबाबत सर्वोच्च न्यायालयाने आज (ता. 6) ऐतिहासिक निर्णय दिला. कलम 377 नुसार समलैंगिकता हा कोणत्याही प्रकारचा गुन्हा नसून, देशातील प्रत्येकाला समानतेचा अधिकार आहे. समलैंगिक असणे यात कोणताही अपराध नाही, असा निर्णय सर्वोच्च न्यायालयाने दिला.  

या निर्णयानंतर बॉलिवूडमधून अनेक कलाकारांकडून स्वागत करण्यात येत आहे. तसेच देशभर सर्वोच्च न्यायालयाच्या निर्णयामुळे समलैंगिकांना न्याय मिळाल्याची भावना आहे. करण जोहरसह फरहान अख्तर, आयुषमान खुर्राना, अर्जुन कपूर, स्वरा भास्कर, फरहान अख्तर, चेतन भगत यांनी ट्विट करत निर्णयाचे स्वागत केले आहे.