नवी दिल्ली - समाजवादी पक्षाचे संस्थापक मुलायमसिंह यादव यांच्या मैनपुरी लोकसभा मतदारसंघातील मैनपुरी पोटनिवडणुकीसाठी समाजवादी पक्षाने मुलायम सिंह यांच्या सूनबाई डिंपल यादव यांना उमेदवारी दिली आहे, तर मुलायमसिंह यादव यांचा मुलगा प्रतीक यांच्या पत्नी अपर्णा यांना भारतीय जनता पक्षाकडून उमेदवारी देण्याची शक्यता आहे. भाजपने अपर्णा यांना उमेदवारी दिल्यास मैनपुरी मतदारसंघात दोन जावा-जावांमध्ये लढत होणार आहे.

अपर्णा यादव यांनी भाजप प्रदेशाध्यक्ष भूपेंद्र चौधरी यांची भेट घेतल्यानंतर या चर्चांना वेग आला आहे. गुरुवारी सायंकाळी ही बैठक झाली. अपर्णा यादव यांनी स्वतः ट्विट करून ही माहिती दिली. मात्र, अपर्णा आणि भाजपचे प्रदेशाध्यक्ष चौधरी यांच्यात काय खलबतं झाली, याबाबत अद्याप कोणतीही माहिती मिळू शकलेली नाही.

मुख्यमंत्री योगी यांच्या अध्यक्षतेखाली शनिवारी प्रदेश भाजपच्या कोअर ग्रुपची बैठक होणार आहे. या बैठकीत मैनपुरीच्या उमेदवाराच्या नावावर चर्चा होणार आहे. मात्र, उमेदावारी दिल्लीतील केंद्रीय निवडणूक समितीकडून निश्चित होणार आहे.

दुसरीकडे सुत्रांनी दिलेल्या माहितीनुसार अपर्णा यादव यांच्या नावाची चर्चा नसून गेल्यावेळी निवडणूक लढवलेल्या प्रेमसिंग शाक्य यांचे नाव उमेदवारीसाठी आघाडीवर आहे.