लखनौ (उत्तर प्रदेश) : उत्तर प्रदेशमधील आगामी विधानसभा निवडणुकीसाठी बहुजन समाज पक्षाने 100 उमेदवारांचा समावेश असलेली पहिली यादी आज (गुरुवार) प्रसिद्ध केली आहे. या यादीत 34 मुस्लिम उमेदवारांचाही समावेश आहे.

यादीमध्ये रामपूर मतदारसंघातून नवाब क्वाझीम अली खान, चामारूवा मतदारसंघातून अली युसूफ अली, गुन्नूरमधून मोहम्मद इस्लाम खान आणि मुझफ्फरनगरमधून साईदा बेगम यांच्या नावाचा समावेश आहे. याशिवाय सहारनपूर येथून मुकेश दीक्षित, देवबंद येथून माजीद अली, कैराना येथून दिवाकर देशवाल, मेरठ कॅन्टोंमेंटमधून सत्येंद्र सोळंकी आणि मेरठ शहरातून पंकज जॉली यांच्या नावाचा समावेश आहे. यापूर्वी निवडणूक लढविलेले धरमपाल सिंह (इतमदपूर), राजा बाला (चापरौली), झाकीर अली (लोणी) आदी नावांचाही यादीत समावेश आहे.

उत्तर प्रदेशची विधनासभा ही 403 सदस्यांची आहे. बुधवारी निवडणूक आयोगाने उत्तर प्रदेशसह अन्य चार राज्यांतील विधानसभा निवडणुकीची कार्यक्रमपत्रिका जाहीर केली. उत्तर प्रदेश विधानसभेसाठी 11 फेब्रुवारी पासून 8 मार्चपर्यंत सात टप्प्यात मतदान प्रक्रिया होणार आहे. त्यामुळे सर्वच पक्षांमधील निवडणूकीसंदर्भातील घडामोडींनी वेग घेतला आहे. एका बाजूला समाजवादी पक्षासमोर अंतर्गत कलह निर्माण झालेले असताना नोटाबंदीच्या निर्णयामुळे भारतीय जनता पक्षाच्या आशा उंचावल्या आहेत.