नवी दिल्ली : सुधारित नागरिकत्व कायद्याच्या (सीएए) विरोधात शाहीनबागेत सुरू असलेल्या आंदोलनास्थळी बुरखा घालून फिरत असलेल्या महिला यूट्युबरला ताब्यात घेण्यात आल्याची माहिती आज पोलिसांनी दिली. या घटनेनंतर आंदोलनस्थळी एकच खळबळ उडाली होती. गुंजा ही मोबाईल फोनद्वारे छुप्या पद्धतीने व्हिडिओ रेकॉर्डिंग करत असल्याचा संशय काही महिला आंदोलकांनी व्यक्त केला.

ताज्या बातम्यांसाठी डाऊनलोड करा ई-सकाळचे ऍप

ताब्यात घेण्यात आलेल्या संबंधित महिलेची ओळख पटली असून, गुंजा कपूर असे तिचे नाव आहे. ती "राईट नॅरेटिव्ह' नावाचे यूट्युब चॅनल चालवते; तसेच पंतप्रधान नरेंद्र मोदी हे गुंजा हिला ट्विटरवर फॉलो करत असल्याचेही समोर आल्याचे सांगण्यात आले. पोलिसांनी सांगितले की, गुंजा ही आंदोलनस्थळी संशयितरीत्या फिरत होती. आंदोलक महिलांना ती सातत्याने विविध प्रश्न विचारत होती. ती युट्यूबर असल्याचे काही महिला आंदोलकांनी ओळखल्यानंतर तिला पकडण्यात आले. या घटनेनंतर घटनास्थळी एकच गोंधळ उडाला. 

गुंजा हिला सरिता विहार पोलिस ठाण्यात नेण्यात आले होते. तिथे तिची संपूर्ण ओळख पटविण्यात आली. तिची चौकशी केल्यानंतर तिला सोडून देण्यात आल्याचे पोलिसांनी स्पष्ट केले. या घटनेनंतर गुंजा हिने निवेदनात म्हटले आहे की, तीन फेब्रुवारी रोजी वृत्तवाहिनीवरील वादविवादाच्या कार्यक्रमासाठी जामिया मिलिया विद्यापीठात गेल्यानंतर आपल्याशी बोलण्यास कोणीही तयार नव्हते. तेथून 20 मिनिटांत आपल्याला बाहेर जावे लागले. त्यामुळे आपण बुरखा घालून शाहीनबागेत जाऊन तेथील महिलांशी बोलण्याचा प्रयत्न केला. आपल्या यूट्युब चॅनेलसाठी एक स्टोरी करण्यासाठी आपण शाहीनबागेत गेले होते, असा दावाही तिने केला आहे.