CBI Raid at Manish Sisodia's House : दिल्लीचे उपमुख्यमंत्री मनिष सिसोदिया यांच्या घरी सीबीआयच्या अधिकाऱ्यांनी छापेमारी केली आहे. याची माहिती खुद्द सिसोदिया यांनीच ट्वीट करत दिली आहे. यामध्ये त्यांनी सीबीआय आली असून, त्यांचे स्वागत आहे. आम्ही अत्यंत प्रामाणिक असून, लाखो मुलांचे भविष्य घडवत आहे. मात्र,आपल्या देशात चांगले काम करणाऱ्यांना अशा प्रकारे त्रास दिला जातो, हे अत्यंत दुर्दैवी आहे. त्यामुळेच आपला देश अजून नंबर-१ बनलेला नसल्याची टीका केली आहे.

सीबीआयच्या या कारवाईनंतर सिसोदिया यांनी तीन ट्वीट केले आहेत. यामध्ये ते म्हणतात की, काही लोक दिल्लीतील शिक्षण आणि आरोग्याच्या उत्कृष्ट कामावर नाराज आहेत. त्यामुळे दिल्लीचे आरोग्यमंत्री आणि शिक्षणमंत्र्यांना अटक करण्यात आली आहे. जेणेकरून शिक्षण आरोग्याची चांगली कामे थांबवता येतील. सिसोदिया म्हणाले की, आमच्या दोघांवर खोटे आरोप आहेत. न्यायालयात सत्य बाहेर येईल.

पुढे ते म्हणाले की, आम्ही सीबीआयचे स्वागत करतो. तपासात पूर्ण सहकार्य करू जेणे करून सत्य लवकर बाहेर येईल. आत्तापर्यंत माझ्यावर अनेक केसेस झाल्या पण काहीही बाहेर आले नाही. त्यातूनही काहीही निष्पन्न होणार नाही. देशात चांगल्या शिक्षणासाठी माझे काम थांबवता येणार नाही असेही सिसोदिया यांनी म्हटले आहे.

सीएम केजरीवाल छापेमारीवर म्हणाले

दुसरीकडे, या छापेमारीवर दिल्लीचे मुख्यमंत्री अरविंद केजरीवाल यांची प्रतिक्रियाही समोर आली आहे. त्यांनी ट्विट केले आहे की, 'ज्या दिवशी दिल्लीच्या शिक्षण मॉडेलचे कौतुक झाले आणि मनीष सिसोदियाचे छायाचित्र अमेरिकेतील सर्वात मोठे वृत्तपत्र NYT च्या पहिल्या पानावर छापले गेले, त्याच दिवशी केंद्राने CBI ला मनीष यांच्या घरी पाठवले. घडणाऱ्या या घडामोडींमध्ये CBI चे स्वागत असून, यापूर्वीही अनेक छापे पडले आहेत. मात्र, काही बाहेर आले नसून, आजच्या कारवाईनंतरही काही निष्पन्न होणार नसल्याचा विश्वास केजरीवील यांनी व्यक्त केला आहे.