दिल्ली : शिवसेनेसोबत युती तोडल्यापासून भाजपा आणि मनसे जवळ येत असल्याच्या चर्चा सुरु आहेत. दरम्यान, नाशिकच्या विश्रामगृहात मिळालेल्या भेटीचे निमंत्रण प्रत्यक्षात आणत काल भारतीय जनता पक्षाचे प्रदेशाध्यक्ष चंद्रकांतदादा पाटील आणि मनसेचे अध्यक्ष राज ठाकरे यांची मुंबईतील कृष्णकुंजवर काल भेट झाली. या भेटीनंतर चंद्रकांत पाटील दिल्लीकडे रवाना झाले. त्यामुळे आगामी मुंबई महापालिका निवडणुकीसाठी भाजपा-मनसे आघाडी करु शकतात, अशी चर्चा राजकीय वर्तुळात सुरु आहे.

दरम्यान, भाजप- मनसेयुती बाबत अमित शहा यांच्याशी चर्चा करणार का असा सवाल चंद्रकांत पाटील यांना विचारले असता ते म्हणाले,''मनसे अध्यक्ष राज ठाकरे यांची भेट आणि दिल्ली दौऱ्याचा काही संबंध नाही. १५ दिवस आधी हा दौरा ठरला होता. राज ठाकरे यांचं भेटी बाबतच मी त्यांना ब्रिफींग करणार आहे. अजून बातचीत प्रायमरी लेव्हलला आहे.

''नव्या मंत्र्यांना भेटणे हा उद्देश आहे. महाराष्ट्र संबंधी प्रश्न मांडणार आहे. जेपी नड्डा, पंतप्रधान मोदी यांच्या भेट घेणार आहे. असेही पाटील यांनी सांगितले. दरम्यान, दिल्लीत चंद्रकांत पाटील यांनी केंद्रीय अर्थ राज्यमंत्री भागवत कराड यांची भेट घेतली, यावेळी राम शिंदे, संजय कुटे, जयकुमार रावल, श्रीकांत भारतीय देखील उपस्थित होते.