नवी दिल्ली : ओडिशातील एका 25 वर्षीय तरूणीने सर्वात कमी वयाची लोकसभा सदस्य होण्याचा मान पटकाविला. चंद्रानी मुर्मू असे त्यांचे नाव असून त्या अभियांत्रिकीच्या पदवीधारक आहेत. आदिवासी मतदारांचे वर्चस्व असलेल्या केंजर या मतदार संघातून बिजू जनता दल (बीजेडी) या पक्षाकडून त्यांनी लोकसभेची निवडणूक लढविली. चंद्रानी मुर्मू यांचे वय 25 वर्षे, 11 महिने आणि नऊ दिवस इतके आहे.

चंद्रानी मुर्मू म्हणाल्या की, रोजगार निर्मिती करणे हे त्यांचे प्रमुख उद्दिष्ट असून मतदारसंघात नवीन उद्योगांची स्थापना करण्यासाठी त्या प्रयत्न करणार आहेत. "केंझरसारख्या खनिजांनी समृद्ध असलेल्या जिल्ह्यातदेखील बेरोजगारीचे संकट जास्त असणे, हे दुर्दैवी आहे. त्यामुळे हे चित्र बदलण्यासाठी मी माझ्या राज्यातल्या तरुणांचे आणि महिलांचे प्रतिनिधित्व देशपातळीवर करणार आहे," असेही  त्यांनी यावेळी स्पष्ट केले.

दरम्यान, चंद्रानी मुर्मू यांनी भाजपच्या अनंत नायक या दोन वेळा खासदार ठरलेल्या उमेदवाराचा 66,203 मतांनी पराभव केला. मर्मू म्हणाल्या की, मेकॅनिकल इंजिनीअरिंग पूर्ण झाल्यानंतर ती नोकरी शोधत होती, मात्र, 2019 ची लोकसभा निवडणूक लढविण्याचा निर्णय त्यांनी घेतला.