छत्तीसगडमध्ये दुर्गा मिरवणुकीत जीपने २० जणांना चिरडल्याची धक्कादायक घटना समोर आली आहे. यामध्ये चौघांना मृत्यू झाला असून अन्य काही जणांची प्रकृती गंभीर आहे.

जशपूरमध्ये दुर्गा रॅली दरम्यान ही घटना घडली आहे. जशपूर जिल्ह्यात दसऱ्याच्या मूहूर्तावर दुर्गा मातेची विसर्जन मिरवणूक सुरू होती. यावेळी एका चारचाकीने मिरवणुकीतील सर्वांना चिरडले. अन्य काही व्यक्ती गंभीर असल्याने मृतांचा आकडा वाढू शकतो. संतप्त नागरिकांनी ही चारचाकी पेटवून दिली आहे. पत्थलगावात सुरू असलेल्या या मिरवणुकीत ६-७ दुर्गा मंडळे एका ठिकाणी जमले होते. यावेळी कारने जमावात घुसत नागरिकांना चिरडलं.

बबलू विश्वकर्मा यांचा मुलगा राधेश्याम विश्वकर्मा (वय 21) असे एका आरोपीचे नाव असून तो बधान, सिंगरौली, मध्य प्रदेशचा रहिवासी आहे. तर दुसऱ्या आरोपीचे नाव रामजन्मा साहू आहे. तो 26 वर्षांचा असून दोघेही मध्य प्रदेशातील बाबरगव्हाण आणि सिंगरौलीचे रहिवासी आहेत. दोन्ही आरोपी मध्य प्रदेशचे रहिवासी असून ते छत्तीसगडमधून जात होते.

या घटनेनंतर स्थानिकांनी काही वेळ रास्तारोको केला. मात्र पोलिसांनी संबंधित चालकाला ताब्यात घेऊन चौकशी सुरू केली आहे. जिल्हाधिकाऱ्यांनीही सर्वांना शांततेचे आवाहन केले. या घटनेनंतर वातावरण तापल्याने पोलिसांनी अतिरिक्त कुमक मागवली आहे.