रायपूर : छत्तीसगढमध्ये पुढच्या वर्षी होणाऱ्या विधानसभा निवडणुकांसाठी मोर्चेबांधणी सुरु असल्याचं पाहायल मिळतंय. छत्तीसगढचे मुख्यमंत्री आणि कॉंग्रेसचे नेते भूपेश बघेल यांनी आता विकासकामावर जोर धरल्याचं दिसतंय. छत्तीसगढमध्ये आज मुख्यमंत्री भूपेश बघेल यांनी येत्या पाच वर्षात छत्तीसगढ रोजगार मिशनच्या माध्यमातून तब्बल १२ ते १५ लाख बेरोजगारांना रोजगार देण्यासाठी काम करत असल्यांचं म्हटलं आहे. तसेच ते सभेत बोलताना पुढं म्हणाले की, आम्ही तब्बल १७१ स्वामी आत्मानंद इंग्रजी माध्यमांच्या शाळा सुरु केल्या आणि आता अशा प्रकारच्या हिंदी माध्यमातील ३२ शाळा स्थापण करणार असल्याचं त्यांनी सांगितलं. ते नारायणपूरमधील एका सभेत बोलत होते.

तसेच ते पुढे बोलताना म्हणाले की, तेंदूपत्ता गोळा करणाऱ्या आदिवासींचे वर्षानुवर्षे शोषण केले जात होते, पण त्यांना न्याय देण्यासाठी आम्ही तेंदू रजा वसुलीचे पैसे २,५०० रुपयांवरून ४,००० रुपये केले आहेत. यामुळे आदिवासींचा फायदा होणार असल्याचं त्यांनी स्पष्ट केलंय.

दरम्यान सभेत पुढं बोलताना ते म्हणाले की, शेतकऱ्यांना आता राजीव गांधी किसान न्याय योजनेचा लाभ मिळणार आहे. या योजनेअंतर्गत शेतकऱ्यांना मत्स्यपालन, सौरऊर्जा आणि ठिंबक सिंचनासाठी सुद्धा या योजनांचा फायदा घेता येणार आहे. या योजनेमुळे शेतकऱ्यांना फायदा होणार आहे असं छत्तीसगढचे मुख्यमंत्री भूपेश बघेल यांनी बोलताना सांगितलं आहे.

नारायणपूरमध्ये १२७ कोटी किंमतीचे १०१ प्रकल्प सुरु केल्याचं त्यांनी सांगितलंय. तसेच अनेक आव्हाने असूनही अबूजमर्हमध्ये आम्ही विकासाला प्राधान्य दिले आहे. आम्ही रस्त्यांचा विकास, शैक्षणिक आणि आरोग्यासंदर्भातील सुविधा पुरवण्यावर भर दिला आहे. असं मुख्यमंत्री भूपेश बघेल नारायणपूर येथील सभेत बोलताना म्हणाले.