नवी दिल्लीः देशाचे सरन्यायाधीश डी.वाय. चंद्रचूड यांनी पदभार घेतल्यापासून एक वर्षाचा कार्यकाळ पूर्ण केला आहे. एका मुलाखतीमध्ये त्यांनी देशातील न्यायालयाशी संबंधित समस्यांबाबत माहिती दिली. चुटकीसरशी सगळे प्रॉब्लेम्स सोडवायला मी जादूगार नाहीये, असं ते म्हणाले.

'इंडियन एक्स्प्रेस'ला दिलेल्या मुलाखतीमध्ये सीजेआय चंद्रचूड म्हणाले की, ज्या दिवशी मी शपथ घेतली होती त्या दिवशी मी न्यायालयाचे सदस्य, बार आणि सर्वांना सांगितलं की, एका झटक्यात समस्या सोडवण्यासाठी मी जादूगार नाही. तरीही न्यायालयांवर परिणाम करणाऱ्या दीर्घकालीन समस्या सोडवण्यासाठी आवश्यक पावलं उचलण्याची तयारी मी दाखवली.

ते पुढे म्हणाले की, मी सगळ्यात अगोदर माझ्या खंडपीठातील माझ्या सहकाऱ्यांशी संवाद साधून त्यांची मतं जाणून घेतली. त्यांनी मांडलेले प्रश्न सोडवण्यासाठी एक कृती आराखडा तयार केला. त्यासाठी न्यायिक प्रक्रियेतील अधिकारी, अभ्यासक आणि संशोधकांची एक टीम तयार केली. त्यामुळे काहीअंशी काम उभं करता आलं.

''न्यायदानाच्या प्रक्रियेमध्ये तंत्रज्ञानाचा प्रभावी वापर आणि खटले वेगाने निकाली लावणं आवश्यक आहे. मागील वर्षभरामध्ये सर्वोच्च न्यायालय आणि न्यायपालीकेतील कामकाजामध्ये बरीच सुधारणा झाली आहे. न्यायिक पक्षाबद्दल सांगायचं झालं तर, वर्षभरात साधारण ५० हजार प्रकरणांचा निपटारा करण्यात आलेला आहे. हा आकडा त्याच कालावधीमध्ये दाखल झालेल्या प्रकरणांइतका आहे.''

चंद्रचूड पुढे म्हणाले की, सोशल मीडियाने न्यायपालीकेच्या कामाजावर लक्ष केंद्रीत केलं आहे. कोर्टात सुरु असलेल्या कार्यवाहीचं लाईव्ह स्ट्रीमिंग होतं. त्यामुळे आतमध्ये नेमकं काय होतं आणि न्यायाधीश नेमकं काय करतात; याचा परिणाम दिसून लागला आहे. न्यायाधीशांनी केलेली विधानं सोशल मीडियावर व्हायरल होताना दिसतात. यामध्ये सकारात्मक आणि नकारात्मक अशा दोन्ही बाजू आहेत.