अमृतसर : पंजाबचे मुख्यमंत्री कॅ. अमरिंदर सिंग यांनी अमृतसर रेल्वे अपघातातील जखमींची भेट घेतली. त्यानंतर घेतलेल्या पत्रकार परिषदेत त्यांनी या अपघाताची चौकशी करून चार आठवड्यात अहवाल सादर करण्याचे आदेश दिले आहेत. तसेच मृतांच्या नातेवाईकांसाठी 5 लाख व जखमींना मोफत उपचार देणार असल्याचे त्यांनी या पत्रकार परिषदेत सांगितले.  

काल रावणदहनाच्या कार्यक्रमावेळी जलंधर-अमृतसर रेल्वेने रेल्वे रूळावर उभ्या असलेल्या लोकांना चिरडले. या भीषण अपघातात 61 लोकांचा मृत्यू झाला, तर 72 जण जखमी झाले आहेत. या अपघाताची न्यायालयीन चौकशी करण्याचे आदेश देण्यात असल्याची माहिती सिंग यांनी दिली. तसेच पोलिस आयुक्तांच्या अध्यक्षतेखाली ही चौकशी केली जाईल व अहवाल सादर केला जाईल असेही त्यांनी सांगितले. सर्व मृतदेहांचे शवविच्छेदन होईल, 9 मृतदेहांची ओळख अद्याप पटलेली नाही, अशीही माहिती सिंग यांनी दिली.

अमरिंदर सिंग यांनी अमृतसरमधील सिव्हिल हॉस्पिटलमध्ये जाऊन जखमींची भेट घेतली. तिथे त्यांना चांगले व मोफत उपचार मिळतील अशीही माहिती त्यांनी यावेळी दिली. 'ही दुर्घटना अत्यंत दुर्दैवी असून ही वेळ आरोप प्रत्यारोपाची नाही' अशा भावना त्यांनी व्यक्त केल्या.