एकाच कार्यालयात एका पोस्टचे दोन अधिकारी आल्यानं विचित्र अशी परिस्थिती निर्माण झाली होती. कार्यालयात दोन अधिकारी एकाच पोस्टचे दाखल झाल्यानं खुर्चीवर कोण बसणार यावरून राडा झाला. कानपूरच्या आरोग्य विभागात ही घटना घडली आहे. चिफ मेडिकल ऑफिसरच्या कार्यालयात सीएमओच्या खुर्चीत कोण बसणार यावरून दोन अधिकाऱ्यांमध्ये वाद झाला. विद्यमान चीफ मेडिकल ऑफिसरला निलंबित केल्यानं सरकारने दुसऱ्या अधिकाऱ्याची नियुक्ती केली. दरम्यान, निलंबित अधिकाऱ्यानं कोर्टाकडून निलंबनाच्या आदेशाला स्थगिती आणली.

निलंबित केलेला अधिकारी आणि नव्याने नियुक्त केलेला अधिकारी असे दोघेही एकाच कार्यालयात पोहोचले. एकाच पोस्टचे दोन अधिकारी एका कार्यालयात दोन खुर्च्या टाकून बसल्यानं कार्यालयातील इतर कर्मचाऱ्यांची मात्र अडचण झाली. डॉक्टर हरीदत्त नेमी यांना काही आठवड्यापूर्वी कानपूर जिल्हाधिकाऱ्यांनी निलंबित केलं होतं. त्यांचं निलंबन मंगळवारी अलाहाबाद उच्च न्यायालयाने रद्द केलं. त्यांना पदभार स्वीकारण्याची परवानगी दिली. उच्च न्यायालयाच्या आदेशावरून ते कार्यालयात पोहोचले. तिथं त्यांनी उच्च न्यायालयाचा आदेशही सर्वांना दाखवला.

दरम्यान, हरीदत्त यांच्यावर कारवाईनंतर सरकारने नव्याने नियुक्त केलेले डॉक्टर उदयनाथ हेसुद्धा कार्यालयात पोहोचले. तिथं डॉक्टर हरीदत्त यांना पाहून ते आश्चर्यचकीत झाले. निर्माण झालेली स्थिती पाहून उदयनाथ यांनी स्वत:ची खुर्ची बाजूलाच ठेवली आणि काम सुरू केलं. प्रमुख आरोग्य सचिवांनी मला जबाबदारी दिलीय. मला जोपर्यंत नवा आदेश मिळत नाही तोपर्यंत कर्तव्य पार पाडेन असं उदयनाथ यांनी म्हटलं.

डॉक्टर हरीदत्त नेमी यांचं निलंबन एक ऑडिओ क्लिप व्हायरल झाल्यानंतर करण्यात आलं होतं. या क्लिकमध्ये एक व्यक्ती जिल्हाधिकाऱ्यांबद्दल वादग्रस्त विधान करताना ऐकू येतं. हा आवाज डॉक्टर नेमी यांचा असल्याचा आरोप करत त्यांच्यावर कारवाई झाली होती. पण हा आपल्याला बदनाम करण्याचा डाव असून ऑडिओमध्ये असणारा आवाज हा एआयद्वारे तयार केला असल्याचा युक्तिवाद डॉक्टर हरीदत्त नेमी यांनी केला.