डेहराडून : उत्तराखंड विधानसभा निवडणुकीत (Uttarakhand Assembly Election) आम आदमी पक्षाचा (Aam Aadmi Party) मुख्यमंत्री पदाचा चेहरा असलेले कर्नल अजय कोठियाल (Colonel Ajay Kothiyal) यांनी आपल्या समर्थकांसह भाजपमध्ये प्रवेश केलाय.

आज (मंगळवार) डेहराडून येथील प्रदेश भाजप कार्यालयात आयोजित कार्यक्रमात त्यांनी भाजपमध्ये प्रवेश केला. मुख्यमंत्री पुष्कर सिंह धामी (CM Pushkar Singh Dhami) आणि भाजप प्रदेशाध्यक्ष मदन कौशिक यांच्या उपस्थितीत कोठियाल यांनी भाजपमध्ये (BJP) प्रवेश केला आहे. भाजप कर्नल यांना महत्त्वाची जबाबदारी देऊ शकतं, असं मानलं जातंय.

कर्नल कोठियाल आणि त्यांच्या समर्थकांनी नुकताच आम आदमी पक्षाचा राजीनामा दिला होता. तेव्हापासून ते भाजपमध्ये प्रवेश करणार असल्याची चर्चा होती. भाजपचे प्रदेशाध्यक्ष कौशिक आणि इतर नेत्यांशी अनेक चर्चेनंतर कर्नल कोठियाल यांनी त्यांच्या समर्थकांसह भाजपमध्ये प्रवेश करण्याचं मान्य केलं होतं. कर्नल कोठियाल यांनी जून 2013 मध्ये केदारनाथ येथील दुर्घटनेनंतर धामच्या पुनर्बांधणीत महत्त्वाची भूमिका बजावली होती. निवृत्तीनंतर त्यांनी तरुणांना सैन्यात भरती होण्यासाठीही प्रशिक्षण देण्यास सुरुवात केलीय.