नवी दिल्ली : दिवंगत CDS जनरल बिपिन रावत यांचे धाकटे भाऊ कर्नल विजय रावत (निवृत्त) (Colonel Vijay Rawat - retired), दिल्लीत भाजपमध्ये सामील झाले आहेत. (CDS General Bipin Rawat) कर्नल विजय रावत (निवृत्त) यांनी उत्तराखंड विधानसभा निवडणुकीपूर्वी उत्तराखंडचे मुख्यमंत्री पुष्कर सिंह धामी यांच्या उपस्थितीत भाजपमध्ये प्रवेश केला. निवडणुकीपूर्वीच केलेल्या या प्रवेशामुळे चर्चांना उधाण आलं आहे.

यावेळी त्यांनी म्हटलंय की, भाजपमध्ये प्रवेश करण्याची संधी मिळाल्याबद्दल मी कृतज्ञ आहे. माझे वडील निवृत्तीनंतर भाजपमध्ये होते आणि आता मला संधी मिळाली आहे. पंतप्रधान मोदींची दृष्टी आणि विचार अतिशय सुज्ञ आणि दुरदृष्टी असणारे आहेत.

उत्तराखंडचे मुख्यमंत्री पुष्कर सिंह धामी आणि पक्षाच्या इतर वरिष्ठ कार्यकर्त्यांच्या उपस्थितीत त्यांनी प्रवेश केला आहे. विजय रावत यांनी दिल्लीत उत्तराखंडच्या मुख्यमंत्र्यांची भेट घेतल्याच्या काही तासांनंतरच हा प्रवेश केला आहे.

उत्तराखंडमधील पौरी गढवाल येथील सीडीएस रावत यांचा 8 डिसेंबर रोजी तामिळनाडूमधील कुन्नूरजवळ झालेल्या हेलिकॉप्टर अपघातात त्यांची पत्नी मधुलिका यांच्यासह अन्य 13 जणांसह मृत्यू झाला होता. 70 सदस्यीय उत्तराखंड विधानसभेसाठी 14 फेब्रुवारी रोजी निवडणूक होणार आहे. मतमोजणी 10 मार्च रोजी होणार आहे.