Sharad Pawar : राष्ट्रवादी काँग्रेस पक्षाचे (NCP) अध्यक्ष शरद पवार यांनी अदानी प्रकरणाबाबत केलेल्या वक्तव्यानंतर राजकारण तापले आहे. आता काँग्रेस नेत्या अलका लांबा यांनी शरद पवारांवर हल्लाबोल केला आहे. शरद पवार यांच्या भूमिकेमुळे महाविकास आघाडीत देखील बिघाडी होणार असल्याची राजकीय वर्तुळात रंगली आहे. 

अलका लांबा म्हणाल्या, "आज फक्त घाबरलेले, लोभी लोक त्यांच्या वैयक्तिक स्वार्थासाठी हुकूमशाही सत्तेचे गुणगान गात आहेत. एकटे राहुल गांधी देशातील जनतेची लढाई लढत आहेत. चोरांपासून भांडवलदार आणि चोरांना संरक्षण देणाऱ्या चौकीदाराविरुद्ध राहुल गांधी लढत आहेत'

अदानी समूहावरील आरोपांच्या जेपीसी चौकशीच्या विरोधात नाही, परंतु या संदर्भात सर्वोच्च न्यायालयाची समिती अधिक योग्य आणि प्रभावी ठरेल, असे शरद पवार म्हणाले होते. एनडीटीव्हीला दिलेल्या मुलाखतीत शरद पवार यांनी अदानी समूहाचा बचाव केला आणि हिंडेनबर्ग संशोधन अहवालाच्या आधारे तयार केल्या जात असलेल्या टिकेवर देखील भाष्य केले.

काय म्हणाले शरद पवार?

संसदेत संख्याबळ पाहता जेपीसीमध्ये २१ सदस्य असतील तर सत्ताधारी पक्षाचे १५ आणि विरोधी पक्षांचे सहा सदस्य असतील, त्यामुळे समितीवर शंका निर्माण होईल, असे पवार म्हणाले होते. मी जेपीसीच्या विरोधात नाही. जेपीसी अनेक वेळा स्थापन झाल्या आहेत आणि मी काही जेपीसीचा अध्यक्ष आहे. बहुमताच्या आधारावर (संसदेत) JPC ची स्थापना केली जाईल. JPC ऐवजी सर्वोच्च न्यायालयाची समिती अधिक योग्य आणि प्रभावी ठरेल असे माझे मत आहे.