नवी दिल्ली : नीट परीक्षेसाठी 24 लाख विद्यार्थ्य्यांनी कष्ट घेतले परंतु एनटीएमधील काही अधिकारी व पदाधिकार्यांच्या संगनमताने झालेल्या गैरव्यवहाराची चौकशी सीबीआय किंवा सर्वोच्च न्यायालयाच्या न्यायाधीशांच्या नेतृत्वातील समितीने करावी, अशी मागणी काँग्रेसचे नेते खासदार गौरव गोगोई यांनी केली आहे.

वैद्यकीय प्रवेशासाठी आवश्यक असलेल्या नीटच्या परीक्षेत अनेक गैरव्यवहार झाल्याचा आरोप केला जात आहे. या परीक्षेच्या विश्‍वासर्हयतेवरच प्रश्नचिन्ह निर्माण झाल्याचा आरोप करून खासदार गोगोई म्हणाले, वाढीव गुण देणे, लाखो पैसे देऊन पेपर फोडण्याचे काम झाले आहे. हे काम एनटीएमधील पदाधिकारी किंवा अधिकार या गैरव्यवहारात सामील असल्याशिवाय होऊ शकत नाही.

यामुळे देशातील 24 लाख युवकांच्या भवितव्याचा प्रश्न निर्माण झाला आहे. परंतु या गैरव्यवहाराशी पंतप्रधान नरेंद्र मोदी यांना काहीही देणेघेणे नाही. निवडणुकीच्यापूर्वी त्यांनी परीक्षा पे चर्चा करून विद्यार्थ्यांना सल्ले दिले होते. आतामात्र ते नीटच्या गैरव्यवहारावर काहीही बोलले नाहीत. ते अभिनंदन स्वीकारण्यात व विदेश वारीत मश्गुल असल्याचा आरोपही खासदार गोगोई यांनी केला.