गुजरातचे काँग्रेस नेते आणि वडगमचे आमदार जिग्नेश मेवानी यांना एका ट्वीटमुळे कोक्राझार पोलिसांनी अटक केली आहे. काल रात्री साडे अकराच्या सुमारास पालनपूर सर्किट हाऊस इथून त्यांना अटक करण्यात आली आहे. त्यांच्या समर्थकांनी या बातमीची पुष्टी केली आहे.

मेवानी यांच्या समर्थकांनी सांगितलं की पोलिसांनी जिग्नेश मेवानी यांच्या अटकेनंतर अद्याप एफआयरची प्रत दिलेली नाही. मेवानी यांना आता अहमदाबाद इथं नेण्यात येईल आणि तिथून पुढे आसाम पोलीस रेल्वेने त्यांना गुवाहाटीला नेतील. आसाममध्ये त्यांच्यावर गुन्हे दाखल करण्यात आल्याची प्राथमिक माहिती मेवानी यांच्या समर्थकांनी दिली आहे.

या अटकेच्या निषेधार्थ मेवानींचे समर्थक आज (२१ एप्रिल) दिल्लीत आंदोलन करणार आहेत. 'संविधान वाचवा, देश वाचवा' अशा घोषणाही या आंदोलनादरम्यान देण्यात येणार आहेत. गुजरात विधानसभा निवडणुका या वर्षाच्या अखेरीपर्यंत होणार आहेत. त्याआधीच मेवानी यांना अटक करण्यात आली आहे.