Congress Leader Joins BRS: काँग्रेसमधून बाहेर पडलेल्या तेलंगणातील नेत्या पलवाई श्रावंती यांनी रविवारी एका समारंभात भारत राष्ट्र समितीमध्ये(बीआरएस) प्रवेश केला. बीआरएसचे कार्यकारी अध्यक्ष के.टी. रामाराव हे यावेळी उपस्थित होते.

यावेळी बोलताना श्रावंती म्हणाल्या, ‘‘मला काँग्रेसमध्ये अपमान सहन करावा लागला. एखाद्या व्यक्तीला जेव्हा नेता मानता तेव्हा, त्याला आदर सन्मान देणेही आवश्‍यक असते मात्र काँग्रेसमध्ये मला त्याचा अभाव जाणवला. यामुळे मी पक्षांतर केले’’.

तेलंगणमधील काँग्रेसच्या माजी प्रवक्त्या असलेल्या श्रावंती यांनी सांगितले की, तेलंगणात काँग्रेसमधीलच काही नेते पक्ष संपवत असून याबाबत पक्षश्रेष्ठींना वर्षभरापूर्वीच सांगितले होते, परंतु वर्षभरात या नेत्यांवर कोणतीही कारवाई झाली नसल्याने अखेर पक्ष सोडण्याचा निर्णय घेतला.

श्रावंती यांनी यावेळी तेलंगणातील काँग्रेसचे नेते रेवंथ रेड्डी, कोमाटी रेड्डी आणि राजगोपाल रेड्डी या नेत्यावर जोरदार टीका केली. ‘‘रेवंथ रेड्डी यांना पक्षात घेतल्यापासून ते पक्षाच्या मूल्यांच्या विरोधात काम करत आहेत.’’ असा आरोपही श्रावंती यांनी यावेळी केला. (Latest Marathi News)