नवी दिल्ली : महाराष्ट्रात स्वबळावर लढण्याच्या काँग्रेस प्रदेशाध्यक्ष नाना पटोले यांच्या घोषणेनंतर ‘आघाडी की एकला चलो रे’ हा पक्षातील गोंधळ निस्तरण्यासाठी (ता. २७) प्रदेश आणि केंद्रीय काँग्रेसच्या वरिष्ठ नेत्यांची बैठक दिल्लीत होणार आहे. मुंबई महापालिकेत भाजपला रोखण्यासाठी यासाठी शिवसेना, राष्ट्रवादी काँग्रेसला सोबत घ्यावे, अशी भूमिका काँग्रेसच्या अन्य नेत्यांची आहे.

महाराष्ट्रातील सत्ताबदलानंतर भाजपने मुंबई महापालिकेची निवडणूक प्रतिष्ठेची केली आहे. गृहमंत्री अमित शहा यांनी अलीकडेच मुंबईच्या दौऱ्यामध्ये महापालिका निवडणुकीचे रणशिंग फुंकताना उद्धव ठाकरेंना धडा शिकविण्याचे विधान केले होते.

त्यानंतर भाजपने शिंदे गटाच्या मदतीने या निवडणुकीची आखणीही केली आहे. त्यामुळे कोणत्याही परिस्थितीत या महापालिका निवडणुकीत भाजपला रोखण्याचीच काँग्रेसची भूमिका असली पाहिजे, असे पक्षातील नेते म्हणत आहेत. यावर, खासगीत बोलताना काँग्रेसच्या एका बड्या नेत्याने प्रदेश काँग्रेस नेतृत्वाच्या स्वबळाच्या भाषेवर आश्चर्य व्यक्त केले. महाविकास आघाडी होणे किंवा न होणे हा मुद्दा बाजूला ठेवून भाजपला रोखणे यालाच प्राधान्य हवे, असे मतप्रदर्शन या नेत्याने केले.

या पार्श्वभूमीवर, आगामी निवडणुकीच्या मुद्द्यावर राज्यातील नेत्यांची बैठक संघटना सरचिटणीस के. सी. वेणुगोपाल आणि प्रदेश प्रभारी एच. के. पाटील यांच्यासमवेत उद्या काँग्रेस मुख्यालयात बैठक होणार आहे.

खर्गे, मोहन प्रकाश यांच्याशी चर्चा नाही?

या बैठकीला प्रदेशाध्यक्ष नाना पटोले, विधिमंडळ पक्षनेते बाळासाहेब थोरात, माजी मुख्यमंत्री अशोक चव्हाण, माजी मुख्यमंत्री पृथ्वीराज चव्हाण यांना बोलावण्यात आले आहे. त्यांच्यासोबतच दिल्लीत असलेले महाराष्ट्रातील काँग्रेस नेते यांचीही मते जाणून घेण्यात येणार असल्याचे समजते. अर्थात, राज्यसभेतील विरोधी पक्षनेते मल्लिकार्जुन खर्गे, मोहन प्रकाश या महाराष्ट्राच्या माजी प्रभारींशी चर्चा होणार की नाही याबाबत पक्षातून काहीही कळाले नाही.