गुजरात निवडणुकीच्या (Gujarat Election) प्रचारादरम्यान पंतप्रधान नरेंद्र मोदींबद्दल (Narendra Modi) वादग्रस्त विधान केल्यामुळं भाजप नेते काँग्रेस अध्यक्ष मल्लिकार्जुन खर्गे यांच्यावर हल्लाबोल करत आहेत.

मल्लिकार्जुन खर्गे (Mallikarjun Kharge) यांच्यावर भाजपचे प्रवक्ते संबित पात्रा यांनी जोरदार टीका केलीय. संबित पात्रा म्हणाले, 'पंतप्रधानांविरोधात अशी भाषा वापरणं योग्य नाही. काँग्रेस अध्यक्षांनी पंतप्रधानांना रावण म्हटलंय. मात्र, ते गुजरातचे (Gujarat) लाल आहेत. देशाचे पंतप्रधान आहेत, त्यांच्याविरोधात अशी भाषा वापरणं निषेधार्ह असून यातून काँग्रेसची मानसिकता दिसून येते. हा केवळ पंतप्रधान मोदींचा (PM Modi) अपमान नाही तर प्रत्येक गुजरातींचा अपमान आहे.'

देशाच्या पंतप्रधानांबाबत अशा प्रकारची भाषा, अपशब्द वापरणं निंदनीय आहे. नरेंद्र मोदी हे गुजरातचे लोहपुत्र आहेत. भारतातील प्रत्येक मागासलेला, मजूर आणि गरिबांना पुढं कसं आणता येईल यासाठी पंतप्रधान सतत काम करत आहेत. मी त्या पवित्र भारताला वंदन करतो, ज्यानं देशाला असा सुपुत्र दिला. पंतप्रधान मोदी हे जगाचे नेते मानले जातात, अशा परिस्थितीत त्यांच्यासाठी असं वक्तव्य करणं योग्य नाही, हे निषेधार्ह आहे. मी गुजरातच्या पवित्र मातीला वंदन करतो, ज्यानं भारताला असा सुपुत्र दिला आहे. मोदींना रावण म्हणणं हा केवळ मोदीजींचा अपमान नाही तर प्रत्येक गुजरातीचा अपमान आहे, असंही संबित पात्रा यांनी स्पष्ट केलं.