नवी दिल्ली- उत्तर प्रदेशच्या सुल्तानपूर लोकसभा मतदारसंघातून मनेका गांधी या भाजपच्या उमेदवार आहेत. मनेका गांधी यांना त्यांचे पुत्र वरुण गांधी आणि भाचे राहुल गांधी यांच्यातील फरकाबाबत प्रश्न विचारण्यात आला होता. यासंदर्भात त्यांनी उत्तर दिलं आहे. वरुण गांधी यांच्यामध्ये बुद्धिमत्ता जास्त आहे, असं त्या म्हणाल्या

राहुल गांधी आणि वरुण गांधी यांची अनेकदा तुलना केली जाते. राहुल गांधी यांच्यापेक्षा वरुण गांधी यांच्यामध्ये जास्त हुशारी असल्याची चर्चा आहे असा प्रश्न मनेका गांधी यांना विचारण्यात आला. तसेच, राहुल गांधी सध्या ज्या ठिकाणी आहेत, त्याठिकाणी वरुण गांधी असते तर काय झालं असतं? असं त्यांना विचारण्यात आलं होतं.

मनेका गांधी यावर म्हणाल्या की, 'या जर-तरच्या गोष्टींना काही अर्थ नसतो. वरुण गांधी यांची बुद्धिमत्ता जास्त आहे. पण, कोणी एखाद्याचे नशीब तर बदलू शकत नाही. अशा परिस्थितीत जे आहे ते ठीक आहे असं म्हणावं लागेल.'

मोदीच होणार तिसऱ्यांदा पंतप्रधान?

मनेका गांधी यांनी नरेंद्र मोदी हे तिसऱ्यांदा पंतप्रधान होतील असा विश्वास व्यक्त केला आहे. भाजपच्या नेतृत्त्वातील लोकशाही आघाडीला बहुमत मिळताना दिसत आहे. त्यामुळे मोदीच पुन्हा पंतप्रधानपदाची शपथ घेतील, असं त्या म्हणाल्या.

मनेका गांधी यांनी काँग्रेस नेते राहुल गांधी यांच्यावर टीका देखील केली. राहुल गांधी म्हणतात सत्तेत आल्यास महिलांच्या खात्यामध्ये खटाखट पैसे येतील. पण, पैसे कुठून येतील. अशा घोषणांना आम्ही शेखचिल्ली म्हणतो, असं त्या म्हणाल्या.

देशात सध्या लोकसभा निवडणुकीचे वातावरण आहे. देशात एकूण सात टप्प्यात मतदान होत आहे. त्यातील पाच टप्पे पार पडले आहेत. ४ जून रोजी मतमोजणी होणार आहे. त्यामुळे मतदार कोणाच्या बाजूने कौल देतात हे पाहणं औत्सुक्याचं राहणार आहे. दरम्यान, मनेका गांधी यांचे पुत्र वरुण गांधी यांचे यंदा भाजपकडून तिकीट कापण्यात आलं आहे.