Latest Political News: आगामी हरियाना विधानसभा निवडणुकीत विद्यमान खासदारांना उमेदवारी दिली जाणार नसल्याचे काँग्रेसच्या छाननी समितीने स्पष्ट केले. यामुळे खासदार कुमारी शैलजा यांच्या तयारीवर पाणी फेरले गेले आहे. येत्या १ ऑक्टोबरला हरियानामध्ये मतदान होणार आहे.

यासाठी उमेदवार निश्चित करण्यासाठी छाननी समितीची बैठक पार पडली. हरिरयानासाठी छाननी समितीचे अध्यक्षपद खासदार अजय माकन यांच्याकडे आहे. या समितीमध्ये हरयाणाचे प्रभारी दीपक बाबरिया, प्रदेशाध्यक्ष उदय भान उपस्थित होते. गेल्या १० वर्षांपासून हरियानात सत्तारुढ भाजपच्या विरोधात काँग्रेस स्वबळावर निवडणूक लढवित आहे.

काँग्रेससाठी सकारात्मक वातावरण दिसत असल्याने निवडणुकीच्या आधीपासून हरियानातील दोन गटामध्ये नेतृत्वावरून धुमश्चक्री सुरू आहे. माजी मुख्यमंत्री भूपेंद्र सिंग हुड्डा व सिरसा मतदारसंघातून निवडून आलेल्या कुमारी शैलजा यांच्यातील गटबाजी समोर येत आहे. कुमारी शैलजा यांनी विधानसभा निवडणूक लढविण्याचे इच्छा व्यक्त केली आहे.

परंतु खासदारांना उमेदवारी मिळणार नसल्याचे प्रभारी दीपक बाबरिया यांनी स्पष्ट केले. शैलजा यांच्याप्रमाणे खासदार रणदीप सिंग सुरजेवाला यांनी सुद्धा विधानसभा निवडणूक लढविण्याची तयारी केली होती. परंतु या दोन्ही नेत्यांना विधानसभा लढविता येणार नसल्याचे स्पष्ट झाले. हरियानातून काँग्रेसचे पाच खासदार निवडून आले आहेत. यात शैलजा व दीपेंद्र हुडा यांचा समावेश आहे.