मध्य प्रदेश पोलिसांत काम करणाऱ्या एका कॉन्स्टेबलला न्यायालयाने शिक्षा सुनावली आहे. 41 वर्षांपूर्वी नोकरीवर रुजू होताना त्यांने बनावट जात प्रमाणपत्र सादर केल्याचे उघड झाले आहे. नोकरीसाठी दुसऱ्या जातीचे प्रमाणपत्र मिळवून तो आरक्षण कोट्यातून पोलिस दलात दाखल झाला होता. महत्वाचे म्हणजे दोषी हवालदाराच्या निवृत्तीला फक्त दोन वर्षे उरली होते.

मिडीया रिपोर्ट्सनुसार, सत्यनारायण वैष्णव असे दोषी हवालदाराचे नाव आहे. ऑगस्ट 1983 मध्ये ते पोलिसात आपक्षक म्हणून भरती झाले. तेव्हा ते अवघ्या 19 वर्षांचे होते. 23 वर्षांनंतर म्हणजेच मे 2006 मध्ये इंदूरच्या छोटी ग्वालटोली पोलीस ठाण्यात सत्यनारायण बनावट जात प्रमाणपत्राच्या आधारे नोकरी करत असल्याची तक्रार आली होती.

आरक्षणासाठी सत्यनारायण यांनी कोरी जातीचे असल्याचे प्रमाणपत्र सादर केले होते, मात्र ते ब्राह्मण आहेत, असा आरोप करण्यात आला. तक्रारीच्या आधारे कॉन्स्टेबलविरुद्ध भादंवि कलम 420, 467, 468 आणि 471 नुसार गुन्हा दाखल करण्यात आला.

पोलिस तपासात काय समोर आलं

या प्रकरणात पोलिसांचा तपास सहा वर्षे चालला. त्यानंतर सत्यनारायण यांनी नोकरीसाठी बनावट प्रमाणपत्र बनवल्याचे समोर आले. आता न्यायालयाने आरोपीला दोषी ठरवून शिक्षा सुनावली आहे. जिल्हा न्यायालयाचे चौथे अतिरिक्त सत्र न्यायाधीश जयदीप सिंग यांनी सत्यनारायण यांना दोन कलमांतर्गत 20 वर्षे आणि उर्वरित दोन कलमांतर्गत प्रत्येकी सात वर्षांची शिक्षा सुनावली आहे. त्याच्यावर चार हजार रुपयांचा दंडही ठोठावण्यात आला आहे.