Employment News : देशातील बांधकाम क्षेत्रामध्ये 2030 सालापर्यंत 10 कोटींहून अधिक नोकऱ्या उपलब्ध असतील, असा दावा एका रिपोर्टमध्ये करण्यात आला आहे. नाईट फ्रँक इंडिया आणि रॉयल इन्स्टिट्यूट ऑफ चार्टर्ड सर्व्हेयर्स (RICS) या संस्थांनी संयुक्तपणे हा रिपोर्ट सादर केला आहे.

बांधकाम हे भारतातील दुसऱ्या क्रमांकाचं सर्वात मोठं रोजगार निर्मिती करणारं क्षेत्र आहे. सध्या या क्षेत्रात 7.1 कोटींहून अधिक कामगार आहेत. ही संख्या 2030 सालापर्यंत 10 कोटींच्या वर जाण्याची शक्यता असल्याचं या अहवालात म्हटलं आहे.

एक ट्रिलियनचं होणार क्षेत्र

भारतातील बांधकाम क्षेत्राचं मूल्य सध्या 650 बिलियन डॉलर्स एवढं आहे. हे 2030 सालापर्यंत वाढून 1 ट्रिलियन डॉलर्स एवढं होईल, अशी शक्यताही या रिपोर्टमध्ये वर्तवण्यात आली आहे. हा आकडा आणखी वाढवायचा असेल, तर देशात कुशल कामगारांची संख्या वाढवण्याची गरज असल्याचं या अहवालात म्हटलं आहे. (National News)

81 टक्के कामगार अकुशल

सध्या उपलब्ध असणाऱ्या 7.1 कोटी कामगारांपैकी तब्बल 81 टक्के कामगार हे अकुशल असल्याचं या अहवालात म्हटलं आहे. तर, केवळ 19 टक्के कामगार हे कुशल आहेत. डेव्हलपर्स आणि कंस्ट्रक्शन कंपन्यांकडून कुशल कामगारांची मागणी केली जात आहे. ही मागणी पूर्ण करण्यासाठी सरकारने, शैक्षणिक संस्थांनी आणि प्रशिक्षण संस्थांनी पुढाकार घेण्याची गरज आहे.

राष्ट्रीय कौशल्य विकास मंडळाच्या आकडेवारीनुसार, तयार होणाऱ्या एकूण कामगारांपैकी (कुशल आणि अकुशल) 87 टक्के कामगार हे रिअल इस्टेट क्षेत्रात भरती केले जातात; तर उरलेले 13 टक्के कामगार हे इन्फ्रास्ट्रक्चर क्षेत्रात जातात.

कौशल्य प्रशिक्षणाची गरज

सध्या बांधकाम क्षेत्रातील 7.1 कोटी कर्मचाऱ्यांपैकी 44 लाख कर्मचारी हे कुशल तंत्रज्ञ आहेत. यामध्ये इंजिनिअर, टेक्निशिअन आणि क्लार्क यांचा समावेश आहे. तर 69 लाख कामगारांना व्होकेशनल प्रशिक्षण मिळालं आहे. बाकी सर्व कामगारांना कसलंही प्रशिक्षण मिळालेलं नसल्याचं समोर आलं आहे. त्यामुळे बांधकाम क्षेत्रात अधिक प्रगतीसाठी कामगारांना प्रशिक्षण देण्याची गरज या अहवालात व्यक्त केली आहे.