नवी दिल्ली : जगातील दुसऱ्या क्रमांकाची लोकसंख्या असलेल्या भारतात कोरोना महामारीचा (Coronavirus) प्रादुर्भाव पुन्हा वाढू लागलाय. गेल्या 24 तासांत इथं 17,336 नवीन कोरोना रुग्ण (Corona Patient) आढळले आहेत, तर 13 जणांचा मृत्यू झालाय. कालच्या तुलनेत आज 30 टक्के जास्त प्रकरणं नोंदवण्यात आली आहेत. काल एकूण 13,313 नवीन प्रकरणं नोंदवली गेली.

आरोग्य मंत्रालयाकडून (Health Ministry) सांगण्यात आलं की, आता देशभरात कोरोनाचे 88284 सक्रिय रुग्ण आहेत. यासह देशातील कोरोना बाधितांची एकूण संख्या आता 4 कोटी 33 लाख 62 हजार 294 झाली आहे. त्याचवेळी, देशात आतापर्यंत एकूण 5 लाख 24 हजार 954 लोकांचा कोरोनामुळं मृत्यू झालाय. कालचं बोलायचं झालं तर देशभरात 13 जणांचा मृत्यू झालाय. यामुळं कोविड मृत्यू दर 1.21 टक्के झाला आहे.

आता दिवसेंदिवस नवीन कोरोना रुग्ण वाढत आहेत ही चिंतेची बाब आहे. देशभरात 88,284 सक्रिय रुग्ण आहेत. एकूण संसर्गाच्या 0.20 टक्के सक्रिय प्रकरणं झाली आहेत. सध्या देशातील रिकव्हरी रेट 98.59 टक्के नोंदवला गेला आहे. गेल्या 24 तासांत देशभरात एकूण 13,029 रुग्ण बरे झाले आहेत. देशभरात आतापर्यंत एकूण 4 कोटी 27 लाख 49 हजार 056 लोकांनी या साथीवर मात केलीय.