नवी दिल्ली- कोरोना महामारीचा प्रादुर्भाव कमी होताना दिसत आहे. आरोग्य मंत्रालयाने दिलेल्या माहितीनुसार, रविवारी देशात 50 हजारांपेक्षा कमी कोरोनाबाधित सापडले आहेत. त्यामुळे एकूण कोरोनाबाधित रुग्णांची संख्या 79 लाखांच्या पुढे गेली आहे. गेल्या काही दिवसांपासून कोरोनाबाधितांची संख्या कमी होताना दिसत आहे. विशेष म्हणजे अनेक दिवसानंतर कोरोना रुग्णांची संख्या 50 हजारांपेक्षा कमी आढळली आहे.

गेल्या 24 तासात 45,149 कोरोनाबाधित रुग्ण सापडले आहेत. एकूण कोरोनाबाधित रुग्णांची संख्या 79,09,960 झाली आहे. कोरोनामुळे मृत्यू होणाऱ्यांची संख्याही घटली असून गेल्या 24 तासात 480 जणांचा जीव गेला आहे. आतापर्यंत 1,19,014 रुग्णांचा कोरोनाने बळी घेतला आहे. देशातील सक्रिय कोविड रुग्णांची संख्या 6,53,717 झाली आहे. रविवारी सक्रिय रुग्णांच्या संख्येत 14,437 ने घट झाली. आतापर्यंत 71,37,229 जणांनी कोरोनावर यशस्वीरित्या मात केली आहे. गेल्या 24 तासात 59,105 रुग्णांना हॉस्पिटलमधून डिस्चार्ज देण्यात आला.