नवी दिल्ली : कोरोनाबाधितांच्या संख्येने देशात चाळीस लाखांचा टप्पा पार केला असून आज शनिवारी हाती आलेल्या आकडेवारीनुसार एकूण कोरोनाबाधितांची संख्या ही 40,23,179 इतकी झाली आहे. मागील चोविस तासात 86,432 इतके नवे रुग्ण सापडले आहेत. गेल्या 24 तासांतील 1089 मृतांसह आजवरच्या एकूण मृतांची संख्या ही 69,561 वर जाऊन पोहोचली आहे. सध्या भारतात 8,46,395 अॅक्टीव्ह केसेस असून 31,07,223 लोक यातून बरे झाले आहेत. गेल्या काही दिवसांत भारतात दिवसाला 80,000 हून अधिक लोक कोरोनाबाधित होत असून हा वाढणारा आकडा चिंताजनक असल्याने सर्वच स्तरात भितीचे वातावरण पाहायला मिळत आहे.  

हिमालयातील युद्धात माहीर : एस्टॅब्लिशमेंट-२२

कोरोनाच्या प्रादूर्भावामुळे अर्थव्यवस्थेवर विपरित असा परिणाम झाला असून जीएसटीच्या संकलनात अडचणी आलेल्या असून अर्थव्यवस्थेला अॅक्ट ऑफ गॉडचा सामना करावा लागत असल्याचं अर्थमंत्री निर्मला सितारामन यांनी म्हटलं होतं. परवाच भारताच्या सांख्यिकी विभागाने जाहीर केलेल्या आकडेवारीनुसार भारताचा जीडीपी -23.09 टक्क्यांनी घसरला असून यापूर्वी इतकी घट कधीही झालेली नव्हती.  आतापर्यंत जागतिक स्तरावर 26,521,304 लोकांना कोरोनाची लागण झाली असून 873,131 लोकांनी आपले प्राण गमावले आहेत. तर 17,638,249 लोक यातून बरे झाले आहेत.