जशपूर- छत्तीसगडच्या जसपूरमधून एक घक्कादायक व्हिडिओ समोर येत आहे. एक जोडपं महामार्गावर बाईकवर स्टंट करताना दिसत आहे. सदर व्हिडिओ सोशल मीडियावर व्हायरल होत आहे. विशेष म्हणजे पोलीस अधीक्षकांसमोरच हा प्रकार घडला आहे. पोलीस अधीक्षकांनी सदर प्रकाराचा व्हिडिओ आपल्या मोबाईलमध्ये शूट केला आहे.

एक तरुण केटीएम बाईकवर आपल्या प्रेयसीला पेट्रोलच्या टाकीवर बसवून स्टंट करत होता. गाडीवर त्यांचा रोमान्स देखील सुरु होता. त्याचवेळी पोलीस अधीक्षकांनी त्यांना रंगेहाथ पकडले. मिळालेल्या माहितीनुसार, बाईक चालकाला चलन फाडण्यात आले आहे. तरुणाचं नाव विनय असल्याचं कळतंय. तो जशपूरच्या हायवेवर आपल्या प्रेयसीवर भुरळ पाडण्यासाठी स्टंट करत होता.

रिपोर्टनुसार, जशपूरचे एसपी शशी मोहन सिंह हे कुंकरी येथून आपल्या कारमध्ये परतत होते. तेव्हा त्यांना राष्ट्रीय महामार्ग (NH)-43 वर एक जोडपं स्टंट करताना दिसलं. पोलिसांची गाडी पाहून तरुणाने पळून जाण्याचा प्रयत्न केला, पण पोलीसांनी त्यांचा पाठलाग करुन पकडले. विनयने हेल्मेट घातले होते. त्याने आपल्या अठरा वर्षीय प्रेयसीला पेट्रोलच्या टाकीवर बसवलं होतं. सोशल मीडियावर हा व्हिडिओ व्हायरल होत असून याला अनेक लोक पाहात आहेत.

पोलीस अधीक्षक शशी मोहन सिंह म्हणाले की, ''आम्ही कुंकरी ते जशपूर येथून परतत होतो. त्यावेळी आम्हाला एक जोडपे धोकादायक स्टंड करताना दिसले. आम्ही त्यांना थांबवलं आणि त्यांची चौकशी केली. त्यांनी सांगितलं की ते मयाली धरण पाहण्यासाठी आले होते. आम्ही त्यांच्याविरोधात कारवाई केली आहे.''

अशा प्रकारचे स्टंट करु नका आणि पालकांनी आपल्या पाल्याकडे लक्ष ठेवावे, असं पोलीस अधीक्षकांनी म्हटलं आहे. अशाप्रकारचे धोकादायक स्टंट करणाऱ्यांविरोधात कठोर कारवाई केली जाईल असं पोलिसांनी म्हटलं आहे.