श्रीनगर : जम्मू काश्‍मीरच्या डोडा जिल्ह्यात भद्रवाह शहरात गेल्या नऊ दिवसांपासून संचारबंदी लागू आहे. आज शहरातील अनेक मशिदींबाहेर अतिरिक्त सुरक्षा दल तैनात करण्यात आले. प्रेषित महंमद पैगंबर यांच्याबाबत केलेल्या वादग्रस्तबाबत स्थानिक कार्यकर्त्यांनी सोशल मीडियावर पोस्ट केल्यामुळे धार्मिक दंगल उसळली होती. भद्रवाह येथे गुरुवारी दोनदा संचारबंदी शिथिल करण्यात आली. यादरम्यान शहरात शांतता होती आणि कोणतिही अप्रिय घटना घडली नाही.

काल वरिष्ठ पोलिस अधिकाऱ्यांनी शहरातील कायदा आणि सुव्यवस्थेचा आढावा घेतला. शुक्रवारच्या नमाजाच्या काळात कोणतिही अप्रिय घटना होऊ नये यासाठी संचारबंदी कायम ठेवण्याचा निर्णय घेतला.

जम्मू जिल्ह्यात निदर्शने

जम्मू जिल्ह्यात शुक्रवारी रस्त्यावर निदर्शने न करण्याचे आवाहन प्रशासनाकडून करण्यात आले होते. तसेच मशिदीबाहेर मोठ्या प्रमाणात पोलिस कर्मचारी तैनात केले होते. आज कोठेही अप्रिय घटना झाली नसल्याचे वृत्त आहे. आठवडाभरापूर्वी शहरातील अनेक भागात निदर्शने झाली होती.