दिल्ली : दिल्लीत भरदिवसा चार गुंडांनी एका उद्योजकाला लुटल्याची घटना घडली आहे. भरसस्त्यात दिवसा कार अडवून बंदुकीचा धाक दाखवून गुंडांनी दा दरोडा टाकला असून ही थरारक घटना सीसीटीव्ही कॅमेऱ्यात कैद झाली आहे. हा व्हिडिओ सोशल मीडियावर चांगलाच व्हायरल झाला आहे.

अधिक माहितीनुसार, इंडिया गेटला रिंग रोडने जोडणाऱ्या प्रगती मैदान टनेलजवळ ही घटना घडली आहे. डिलीव्हरी एजंट दोन लाख रूपयांची रोकड घेऊन गुरूग्रामला जात असताना ही घटना घडली असल्याची माहिती आहे. गाडी जात असताना दोन दुचाकीवरून चार दरोडेखोर येतात आणि भर रस्त्याच्या मध्येच चारचाकी गाडीला थांबवतात.

त्यानंतर दोघेजण गाडीवरून उतरतात आणि बंदुकीचा धाक दाखवून गाडीचा दरवाजा खोलतात आणि पैशांची बॅग घेऊन पलायन करतात. हा थरारक प्रसंग पाहून इतर वाहनेसुद्धा पुढे निघून जात असताना यामध्ये दिसत आहेत.

दरम्यान, नवी दिल्लीतील टिळक मार्ग पोलीस स्टेशन येथे याप्रकरणी तक्रार दाखल करण्यात आली असून पोलिसांकडून दरोडेखोरांचा तपास सुरू करण्यात आला आहे.

दिल्लीचे मुख्यमंत्री अरविंद केजरीवाल यांनी याप्रकरणी एलजीचा राजीनाम्याची मागणी केली आहे. "तुम्ही दिल्लीला सुरक्षित ठेवू शकत नसाल तर सूत्रे आमच्या हातात द्या, दिल्लीला सुरक्षित कसं ठेवायचं ते आम्ही तुम्हाला सांगतो." असं ते म्हणाले आहेत.