नवी दिल्ली : कोरोना व्हायरसच्या महामारीमुळे आर्थिक संकट निर्माण झाले आहे. असे असताना आता दिल्लीकरांसाठी मुख्यमंत्री अरविंद केजरीवाल यांनी महत्त्वपूर्ण निर्णय घेतला आहे. दिल्लीत डिझेलवरील व्हॅट कमी करण्यात आला आहे. त्यामुळे आता डिझेलच्या दरात मोठी कपात होणार आहे. 

ताज्या बातम्यांसाठी डाऊनलोड करा ई-सकाळचे ऍप   

राजधानी दिल्लीत यापूर्वी डिझेलवर 30 टक्के व्हॅट आकारला जात होता. मात्र, आता यामध्ये कपात करण्यात आली असून, 16 टक्के करण्यात आला आहे. डिझेलवरील व्हॅट कमी केल्याने आता डिझेलचे दर 8.36 रुपये/प्रतिलिटर कमी झाले आहेत. याबाबत मुख्यमंत्री केजरीवाल यांनी सांगितले, की लॉकडाऊननंतर आता हळूहळू लोक कामावर परतत आहेत. ज्यांना नोकरीची गरज आहे आणि जे नोकरी देत आहेत त्यांच्यासाठी जॉब पोर्टलची निर्मिती करण्यात आली आहे. त्याला उत्तम प्रतिसादही मिळत आहे.

मी दिल्लीतील सर्व व्यापारी आणि दुकानदारांना आवाहन करतो, की सर्वांनी मिळून दिल्लीची अर्थव्यवस्था सुधारण्यासाठी योगदान द्यायला हवे. त्यासाठी एकत्र येण्याची गरज आहे. येत्या दिवसात व्यापाऱ्यांसोबत बैठक घेऊन त्यांच्याशी संवाद साधणार आहे. 

आरटी-पीसीआर टेस्ट

केजरीवाल यांनी कोरोनाच्या पार्श्वभूमीवर सर्व अधिकाऱ्यांना नवा आदेश जारी केला आहे. त्यांनी सांगितले, की ज्या रुग्णाची अँटिजेन टेस्ट निगेटिव्ह आली आहे. मात्र, त्यांना कोरोनाची लक्षणे असतील तर आरटी-पीसीआर टेस्ट करणे गरजेचे आहे.

दिल्लीत वाढताहेत बरे होणारे रुग्ण

दिल्लीच्या आरोग्य विभागानुसार, एक आठवड्यापूर्वी एकूण रुग्णांची संख्या 125509 होती आणि आता 106118 रुग्ण बरे झाले आहेत. 

दरम्यान, दिल्लीत कोरोनाची परिस्थिती आता सुधारत आहे. कोरोनाबाधित रुग्णांसाठी दिल्ली सरकारने बनविलेले कोविड केअर सेंटर आता बहुतांश प्रमाणात रिकामे दिसत आहे. हे दिल्लीत कोरोनावर नियंत्रण आणल्याचे मोठे संकेत आहेत.  

पुण्याच्या बातम्या वाचण्यासाठी येथे ► क्लिक करा