देवभूमी द्वारका : ‘‘भूपेंद्र पटेल हे गुजरातचे कळसूत्री मुख्यमंत्री आहेत. ते साधी त्यांच्या शिपायाची नियुक्तीही करू शकत नाहीत,’’ अशी खिल्ली दिल्लीचे मुख्यमंत्री अरविंद केजरीवाल यांनी उडविली.

देवभूमी द्वारका जिल्ह्यातील खंभालिया येथे आम आदमी पक्षाचे मुख्यमंत्रिपदाचे उमेदवार इसुदान गढवी यांच्या प्रचारसभेत ते बोलत होते. भाजप आणि काँग्रेसचा गुप्त समझोता झाला असल्याची टीकाही केजरीवाल यांनी केली. ते म्हणाले, की गुजरातच्या जनतेपुढे दोन चेहरे आहेत. एक इसुदान गढवी यांचा अन दुसरा भूपेंद्र पटेल यांचा. तुम्ही कोणाला मत देणार? असा सवाल त्यांनी उपस्थितांना केला.

गढवी हे तरुण आहे, शिक्षित आहेत. त्यांना गरिबांविषयी कळवळा आहे. ते शेतकऱ्यांचे पुत्र आहेत. गुजरातचे मुख्यमंत्री भूपेंद्र पटेल यांच्यावर टीका करताना ते म्हणाले,‘‘ दुसऱ्या बाजूला भूपेंद्र पटेल आहेत. त्यांना कोणतेही अधिकार नाहीत. ते कळसूत्री मुख्यमंत्री आहेत. ते चांगली व्यक्ति आहेत. ते खूप धार्मिक असल्याचे मी ऐकले आहे. पण कोणीही त्यांचे ऐकत नाहीत.’’ तुम्हाला कळसूत्री मुख्यमंत्री हवा की शिक्षित मुख्यमंत्री हवा, अशी विचारणाही केजरीवाल यांनी केली.

गुजरातमध्ये ‘आप’च्या बाजूने लाट आहे. हे कसे शक्य झाले, याचा विचार करीतच मी माझे डोळे मिटले. हात जोडले. तेव्हा कोणत्यातरी दैवी शक्तीने हे घडवून आणले असल्याचे माझ्या लक्षात आले. माझ्या पक्षाला कृष्ण आणि देवीचे आशीर्वाद लाभले आहेत. जेव्हा पापाचा घडा भरतो, तेव्हा देव धडा शिकवतो, असे गीतेत लिहिलेले आहे.’’

- अरविंद केजरीवाल, मुख्यमंत्री, दिल्ली