नवी दिल्ली : दिल्लीतील एका १६ वर्षीय मुलाने एका १७ वर्षीय मुलाला अमानुष पद्धतीने मारल्याची घटना पुढे आली आहे. मारेकऱ्याने या मुलावर ५५ वेळा चाकूने वार केले. त्यानंतर त्याचा गळा चिरला. तसेच त्याचा मृतदेह ओढत रस्त्यावर आणला. यावर कडी म्हणजे, हे कृत्य करत असताना त्याने रस्त्यावर नृत्यही केले. हा थरार पूर्व दिल्लीतील वेलकम कॉलनी परिसरात मंगळवारी घडल्याची माहिती पोलिसांनी गुरुवारी दिली.

हा सर्व थरार सीसीटीव्ही कॅमेऱ्यात कैद झाला आहे. सुमारे अडीच मिनिटांच्या सीसीटीव्ही फुटेजमध्ये आरोपी इतरांना धमकावत असल्याचेही दिसते आहे. आरोपीने १७ वर्षांच्या या मुलाकडे बिर्याणी आणण्यासाठी पैसे मागितले होते. मात्र, त्याने न दिल्याने रागाच्या भरात त्याने हे अमानुष कृत्य केल्याचे सांगण्यात आले. पोलिसांनी आरोपीला बुधवारी सकाळी ताब्यात घेतले असून, त्याने गुन्हा कबूल केल्याचे पोलिसांनी सांगितले.

ही घटना मंगळवारी रात्री सव्वाअकराच्या सुमारास घडली. त्यानंतर पीडिताला रुग्णालयात नेण्यात आले. मात्र, त्याचा मृत्यू झाला. सीसीटीव्हीमधील फुटेजनुसार, आरोपी पीडिताला एका छोट्या गल्लीत नेऊन त्याच्यावर वार करत असल्याचे दिसते आहे. आरोपी हे कृत्य करत असताना एकाने दार उघडून त्याला पाहिले; पण, आरोपीने त्याला चाकूने भोसकण्याची धमकी दिल्याचे तपास अधिकाऱ्यांनी सांगितले. तसेच तो आजूबाजूच्या व्यक्तींना दूर राहण्यास ओरडून सांगत असल्याचेही दिसते आहे. हे करताना त्याने मद्यप्राशन केल्याचेही तपास अधिकाऱ्यांनी सांगितले.

क्रौर्याच्या सर्व सीमा पार

ज्यावेळी आरोपीने पीडिताला बिर्याणी आणण्यासाठी पैसे मागितले. त्यावेळी पीडिताने त्याला पैसे दिले नाहीत. त्यानंतर त्यांच्यात वाद झाला. वादाचे रूपांतर भांडणात झाले, अशी माहिती पोलिसांनी दिली. पीडित मुलगा हा जाफ्राबाद परिसरातील रहिवासी असून, आरोपीने सुरुवातीला बेशुद्ध होईपर्यंत त्याचा गळा दाबला.

त्यानंतर आपल्याजवळील छोट्या चाकूने त्याच्यावर बरेच वार केले. त्यानंतरही त्याचे समाधान झाले नाही. त्याने पीडिताला एका गल्लीत नेऊन त्याच्या तोंडावर, मानेवर, पाठीवर आणि डोळ्यांच्या खाली सुमारे ५५ वेळा वार केले. यानंतर आरोपीने पीडिताच्या जवळ असणारे साडेतीनशे रुपये चोरले आणि तो तेथून पळून गेला.