BRS Leader K. Kavita : दिल्लीतल्या कथित दारु घोटाळा आणि आर्थिक गैरव्यवहार प्रकरणामध्ये तपास यंत्रणांकडून सातत्याने कारवाया केल्या जात आहेत. शुक्रवारी सीबीआयने बीआरएस नेत्या के. कविता यांना कोर्टासमोर सादर केलं. सीबीआयने कोर्टाकडे के. कविता यांच्यासाठी पाच दिवसांची कोठडी मागितली आहे.

के. कविता यांना गुरुवारी अटक

मद्य धोरण घोटाळ्याप्रकरणी तिहार तुरुंगात असलेल्या भारत राष्ट्र समितीच्या (बीआरएस) नेत्या के. कविता यांना सीबीआयने गुरुवारी अटक केली. कविता यांना ईडीने 15 मार्च रोजी हैदराबाद येथून अटक केली होती. त्यानंतर त्यांना न्यायालयाने कोठडीत ठेवण्याचा आदेश दिला होता. मद्य धोरण प्रकरणातील साक्षीदारांना प्रभावित करण्याचा प्रयत्न कविता यांनी केल्याचे दिसून आले आहे. जामीन देण्यात आला तर त्या पुन्हा साक्षीदारांना प्रभावित करू शकतात, असे सांगत न्यायालयाने कविता यांची कोठडी 23 तारखेपर्यंत वाढवली होती. आता सीबीआयकडून कारवाईला सुरुवात झाल्याने कविता यांच्या अडचणीत भर पडली आहे.

सीबीआयने शुक्रवारी म्हटलं की, आम आदमी पक्षाला शंभर कोटी रुपये अरेंज करुन देण्यामध्ये के. कविता यांचा मोठा हात आहे. या प्रकरणात त्या मुख्य कट करणाऱ्या आहेत. एका मोठ्या उद्योगपतीने अरविंद केजरीवाल यांच्याशी बोलणी केली आणि केजरीवालांनी त्यांना मद्य धोरणाच्या माध्यमातून सहकार्य केलं.

सीबीआयने कोर्टात पुढे म्हटलं की, के. कविता यांनी सरतचंद्र रेड्डी यांना बोलणी करण्यासाठी पुढे केलं. दिनेश अरोरा यांनी आपल्या जबाबाची पुष्टी केली की अभिषेक बोईनपल्लीने सांगितलं की, विजय नायर यांना शंभर कोटी रुपये दिले आहेत. सीबीआयने आपल्या युक्तीवादाच्या समर्थनासाठी सरकारी साक्षीदार दिनेश अरोरा यांच्या जबाबाबाचा हवाला दिला.

सीबीआयने न्यायालयाला पुढे सांगितले की, या प्रकरणाशी संबंधित अनेक आरोपींचे जबाब नोंदवण्यात असून हॉटेल ताज येथे यासंदर्भात बैठक झाली होती. मार्च ते मे २०२१ मध्ये, अबकारी धोरण बनवण्याची प्रक्रिया सुरू असताना अरुण पिल्लई, बुची बाबू, बोईनपल्ली हे सर्वजण दिल्लीतील हॉटेल ताजमध्ये थांबले होते.

सीबीआयने पुढे सांगितले की, के. कविता यांनी हैदराबादमध्ये व्यावसायिकाची भेट घेतली होती. एवढेच नाही तर विजय नायरच्या संपर्कात के. कविता होत्या. कविता यांनी व्यावसायिकाला 100 कोटी रुपयांची आगाऊ रक्कम देण्यास सांगितले होते, असं कोर्टाला सांगण्यात आलं.