नवी दिल्ली : देशाची राजधानी दिल्लीत (Delhi) एक धक्कादायक घटना समोर आलीय. इथं अवघ्या 500 रुपयांसाठी एका व्यक्तीची हत्या करण्यात आलीय. ही घटना समयपूर बादली भागातील (Samayapur Badli) आहे. आरोपींनी आधी त्या व्यक्तीच्या डोक्यात सिलेंडरला घातला आणि नंतर गळा चिरुन त्याचा खून केलाय. याप्रकरणी पोलिसांनी बॉबी आणि रामविलास या दोन मित्रांना अटक केलीय. कर्जात घेतलेले पाचशे रुपये परत न केल्यामुळे हा खुनी हल्ला करण्यात आलाय.

पोलिसांनी (Police) दिलेल्या माहितीनुसार, राजबीर असं मृताचं नाव असून, तो कचरा वेचण्याचं काम करत होता. राजबीर हा समयपूर बादली भागातील जीटी कर्नाल रोड (GT Karnal Road) येथील झोपडपट्टीत राहत होता. बॉबी (23) आणि राम निवास (27, रा. अलिगड, उत्तर प्रदेश) यांना हत्येप्रकरणी अटक करण्यात आलीय. पोलिसांनी सांगितलं की, शुक्रवारी रात्री उशिरा आम्हाला खुनाची माहिती मिळाली आणि घटनास्थळी पोहोचल्यावर त्यांना झोपडपट्टीजवळ गळा चिरलेला आणि डोक्याला जखमा असलेला रक्तानं माखलेला मृतदेह आढळला.

राजबीरनं बॉबीकडून 400-500 रुपये उसने घेतले होते, ज्याची परतफेड तो करू शकला नाही. पोलिस चौकशीत आरोपींनी सांगितलं की, शुक्रवारी तिघांनी मिळून दारू प्यायली आणि पैसे मागितल्यावर राजबीरनं बॉबीला शिवीगाळ केली. याचा राग मनात धरुन बॉबीनं राजवीरच्या डोक्यात सिलेंडर घातला आणि त्यानंतर राम निवासनं त्याचा ब्लेडनं गळा चिरला, अशी त्यांनी कबुली दिलीय.