प्रयागराज : उत्तर प्रदेशमधील प्रयागराज येथे सुरू असलेल्या 'महाकुंभ 2019'मध्ये दररोज विविध महंतांचे प्रवचन आयोजित केले जाते. नाग वासुकी परिसरात सुरू असलेल्या पाठाच्या तिसऱ्या दिवशी रविवारी (ता. 20) देवकीनंदन ठाकुर यांनी सांगितले की, कृष्णाच्या समान इतर कोणतीही देवता नाही व गंगेसमान इतर कोणतीही नदी नाही, तर या त्रिवेणी संगमासारखे दुसरे तीर्थक्षेत्र नाही. देवाचं भक्ताशी नातं हा प्रेम व आस्थेचा विषय आहे. प्रेमामुळेच गोपिका व मीरा कृष्णमय झाल्या होत्या. त्यामुळे देवाकडे कोणत्याच प्रकारचा भेदभाव नसतो, असे ठाकूर यांनी सांगितले.  

संत मोरारी बापू यांनी मानस संगम कथेच्या दुसऱ्य़ा दिवशी सांगितले की, या तिर्थक्षेत्री जो भक्तीभाव मनात ठेवून येईल, त्याच्या सर्व इच्छा पूर्ण होतील. या महाकुंभात अर्थ, धर्म, काम व मोक्ष या सगळ्याची द्वारे खुली असतात. कौटुंबिक कलहाबद्दल त्यांनी चिंता व्यक्त केली. तसेच कलह होऊ नये यासाठी त्यांनी उपाय सांगितले. पती-पत्नीमधील नात्याबद्दलही त्यांनी मत व्यक्त केले. पती-पत्नीने अहंकार सोडून सहजतेने एकमेकांना स्विकारायला हवे, असे सांगितले. तसेच मोरारी बापू यांनी व्यसनापासून दूर राहण्याचा संदेश दिला.

माघी पौर्णिमेदिवशी जुन्या आखाड्याचे महामंडलेश्वर उमाकांत आनंद सरस्वती यांनी कुंभनगरात प्रवेश केला. त्यांच्या शिबिरात असलेली शिवाची मूर्ती ही आकर्षणाचे केंद्र ठरत आहे. तसेच या शिबिरात रूद्राभिषेक कार्यक्रमही पार पडला.