Donated Egg Got Over 2 Lakhs In Auction In Kashmir:

काश्मीरमधील सोपोरमधील मालपोरा गावातून एक हृदयस्पर्शी घटना समोर आली आहे. एका गरीब माणसाने स्थानिक मशिदीच्या बांधकामाला हातभार लागावा यासाठी एक अंडे दान केले. त्यानंतर या अंड्याच्या लिलावत त्याच्यावर तब्बल 2.26 लाख रुपयांचे बोली लागली. ज्यातून मशिदीच्या बांधकामासाठी लाखो रुपये उभा राहिले.

मशिदीच्या बांधकामासाठी निधी गोळा करायला गावकऱ्यांनी एकत्र येत फेरी काढली. या दरम्यान देणगी म्हणून एक अंडे मिळाले. या अंड्याच्या अनोख्या देणगीने सर्वांचे लक्ष वेधून घेतले. मस्जिद समितीने देणगीदाराचा प्रामाणिकपणा ओळखून हे अंडे लिलावासाठी ठेवण्याचा निर्णय घेतला.

दरम्यान, एका वृद्ध महिलेने नाव न सांगण्याची विनंती करत सांगितले की, तिला तिच्या कोंबडीने दिलेले ताजे अंडे दान करायचे होते. यांनंतर हे अंडे लिलावात टाकण्यात आले. लिलावादरम्यान हे अंडे इतके आकर्षक ठरले की, पाच ते सात रुपये किंमत असलेल्या या अंड्याला लिलावात सर्वाधिक किंमत मिळाली.

एका स्थानिक नागरिकाने सांगितले की, लोक तीन दिवस अंड्यावर बोली लावत राहिले आणि प्रत्येक फेरीनंतर, यशस्वी बोली लावणाऱ्याने त्याच्या बोलीची रक्कम भरत रकमेसह अंडे समितीकडे परत केले. जेणेकरून त्यावर अधिकाधिक लोक बोली लावू शकतील.

लिलावाच्या शेवटच्या दिवशी दानिश अहमद नावाच्या तरुण व्यावसायिकाने हे अंडे 70 हजार रुपयांना विकत घेतले. दरम्यान, लिलावात ही अंडी अनेकवेळा विकत घेण्यात आली. त्यानंतर एकूण किंमत 2 लाख 26 हजार 350 रुपये एवढी होती.

दानिशने सांगितले की, गावात एक मोठी मशीद बांधायची आहे. त्यासाठी मोठ्या रकमेची गरज होती. मी श्रीमंत नाही, पण मला मशीद बांधण्यासाठी काहीतरी करायचे होते. त्यामुळे मी 70 हजार रुपये देऊन हे अंडे खरेदी केले.

दानिश म्हणाला की, अंडे विकत घेतल्यानंतर माझ्या आईने मला मिठी मारली आणि म्हणाली की तू चांगले केले आहेस. आमच्या गावात सुमारे 250 घरे आहेत. घर चालवण्यासाठी प्रत्येकजण सफरचंदाच्या बागेत कष्ट करतो, पण मशिदीसाठी गावातील प्रत्येक व्यक्ती योगदान देत आहे.