DY Chandrachud:  वकिलांनी नवीन खटल्यांच्या सुनावणीच्या स्थगितीची मागणी करू नये, असे आवाहन करत सर्वोच्च न्यायालय ‘तारीख पे तारीख’ न्यायालय होऊ नये, अशी अपेक्षा सरन्यायाधीश धनंजय चंद्रचूड यांनी आज व्यक्त केली.

काल (शुक्रवार) न्यायालयात सुनावणीच्या कामकाजाला सुरुवात होताच सरन्यायाधीशांनी वकिलांकडून नवीन खटल्यांच्या सुनावणीला स्थगिती मागितली जात असल्याचा मुद्दा उपस्थित केला. गेल्या दोन महिन्यांत वकिलांकडून ३,६८८ प्रकरणांच्या सुनावणीच्या स्थगितीची मागणी करण्यात आल्याची आकडेवारीही त्यांनी सादर केली.

सरन्यायाधीश यावेळी वकिलांना उद्देशून म्हणाले, की अतिशय आवश्यक असल्याखेरीज संबंधित प्रकरणाची सुनावणी स्थगित करण्याची विनंती करू नका. हे ‘तारीख पे तारीख’ न्यायालय होऊ नये, अशी माझी इच्छा आहे.

सर्वोच्च न्यायालयाच्या बार असोसिएशनच्या मदतीमुळे सर्वोच्च न्यायालयात नवीन याचिका दाखल केल्यावर त्यांच्या सुनावणीसाठी लागणारा वेळ लक्षणीयरित्या कमी झाला आहे, असे निरीक्षणही त्यांनी नोंदविले.  मात्र, सर्वोच्च न्यायालयातील खंडपीठापुढे याचिकेवर सुनावणी होत असताना संबंधित वकील स्थगितीची मागणी करतात. त्यातून बाहेरच्या जगात अतिशय वाईट संदेश जातो. (Latest Marathi News)

आज प्रकरणांच्या स्थगितीच्या १७८ स्लीप दाखल करण्यात आल्या आहेत. ऑक्टोबर महिन्यापासूनच्या प्रत्येक दिवशी अशा १५० स्लीप दाखल होत आहेत. सप्टेंबर आणि ऑक्टोबर या दोन महिन्यांतील स्थगितीची मागणी करणाऱ्या स्लिपची संख्या ३,६८८ वर गेली आहे.  

-धनंजय चंद्रचूड, सरन्यायाधीश