महाराजगंज- मोतिहारी - ‘डॉ. बाबासाहेब आंबेडकर नसते तर पंडित जवाहरलाल नेहरू यांनी वंचित घटकांना कधीच आरक्षण दिले नसते. पंडित नेहरू यांनी वंचितांच्या आरक्षणाला विरोध केला होता,’ असा आरोप पंतप्रधान नरेंद्र मोदी यांनी बिहारमधील महाराजगंज येथील सभेत बोलताना केला.

पंतप्रधान नरेंद्र मोदी म्हणाले, ‘आरक्षणाबाबत नेहरूंनी राज्यांच्या तत्कालीन मुख्यमंत्र्यांना पत्र लिहिले होते त्यातून ही बाब स्पष्टपणे दिसून येते, राजीव गांधी असो की इंदिरा गांधी त्यांनी अनुसूचित जाती, जमाती आणि इतर मागास घटकांच्या आरक्षणाला विरोधच केला होता. या घटकांना काँग्रेसकडून कधीच सन्मान मिळू शकत नाही.’

‘इंडिया’ आघाडी धार्मिक, जातीयवादी आणि घराणेशाहीच्या मानसिकतेची आहे. भ्रष्टाचार, लांगुलचालनाचे राजकारण व सनातन धर्मविरोधी मानसिकता याचा या आघाडीला फटका बसेल,’ असे त्यांनी नमूद केले. गांधी आणि नेहरू कुटुंबीयांवरही पंतप्रधान मोदींनी टीका केली. ‘‘काँग्रेसच्या नेत्यांनी पंजाब, तेलंगण व तमिळनाडूतील लोकांवर टीका केली होती पण त्यांच्यावर कोणतीही कारवाई झाली नाही.

त्यामुळे ते काही स्थानिक खासदार निवडण्यासाठी नाही तर पंतप्रधानांची निवड करण्यासाठी मतदान करत आहेत हे लोकांनी लक्षात घ्यावे,’ असे त्यांनी सांगितले. ‘‘अनुसूचित जाती, अनुसूचित जमाती आणि इतर मागासवर्गीयांचे आरक्षण काढून घेण्यासाठी काँग्रेसला देशाच्या राज्यघटनेत बदल करायचा आहे. राज्यघटना तयार करताना डॉ. आंबेडकर नसते तर नेहरूंनी एससी आणि एसटी या घटकांना कधीच आरक्षण मिळू दिले नसते,’ असा आरोप त्यांनी केला.

राहुल, अखिलेश लक्ष्य

राहुल गांधी, अखिलेश यादव आणि तेजस्वी यादव यांच्यावर टीका करताना मोदींनी ही नेते मंडळी चांदीचा चमचा तोंडात घेऊन जन्माला आली असल्याचा टोला लगावला. तेजस्वी यांच्यावर टीका करताना ते म्हणाले, ‘जंगलाराजचे वारसदार मला हरविण्याची भाषा बोलत आहेत. काँग्रेसच्या शहजाद्यांना मला रडताना पाहायचे आहे. त्यांच्या पक्षाने उघडपणे ‘मोदी तेरी कब्र खुदेगी’ अशी घोषणा दिली आहे.’