नवी दिल्ली : कोरोना महासाथीविरोधात भारत सध्या लढा देत आहे. सध्या लसीकरणाची मोहिम मोठ्या प्रमाणावर सुरु असून परिस्थिती मात्र संपूर्णत: पूर्ववत झालेली नाहीये. कोरोना विरोधातील या लढ्यामध्ये निर्णायक भुमिका निभावणाऱ्या डीआरडीओने विकसित केलेल्या औषधाकडे सध्या सर्वांचं लक्ष लागून राहिलेलं आहे. 2-डीजी असं या औषधाचं नाव आहे. डॉ. रेड्डीज लॅबोरेटरीजने म्हटलंय की, कोरोनाचं हे स्वदेशी औषध लवकरच बाजारात उपलब्ध होणार आहे.

डीआरडीओने एक जून रोजी म्हटलं होतं की, कोरोना संक्रमित असलेल्या रुग्णांच्या उपचारांसाठी या औषधाच्या आपत्कालीन वापराला मंजूरी दिली गेली आहे. त्यानंतर या औषधाचा वापर काही मोजक्या हॉस्पिटल्समध्ये केला जात होता. मात्र आता हे औषध सरकारी हॉस्पिटल्ससोबतच खासगी हॉस्पिट्लसना देखील विकण्यात येणार आहे. डॉ. रेड्डीज लॅबोरेटरीजने म्हटलंय की, त्यांना या गोष्टीचा आनंद आहे की, कंपनी लवकरच भारतभरातील प्रमुख सरकारी आणि खासगी हॉस्पिटल्सना या औषधाचा सप्लाय करणार आहे.

काय आहे किंमत?

डॉ. रेड्डीज लॅबोरेटरीजच्या सांगण्यानुसार, या औषधाच्या एका पाऊचची किंमत 990 रुपये ठरवण्यात आली आहे. हा सब्सिडीसोबत सरकारी संस्थाना दिला जाणारा दर आहे.

2डीजी औषधाची निर्मिती इन्स्टिट्यूट ऑफ न्यूक्लिअर मेडिसीन अँड अलाईड सायन्सेस द्वारा विकसित केलं गेलं होतं. क्लिनिकल ट्रायल्समध्ये हे सिद्ध झालंय की, 2-DG हे औषध जे रुग्ण रुग्णालयांमध्ये उपचार घेत आहेत तसेच जे रुग्ण सिलिंडरमधील ऑक्सिजन अवलंबून आहेत त्यांना हे औषध घेतल्यानंतर ऑक्सिजनची गरज कमी होऊ शकते. ज्या रुग्णांना 2 DG हे औषध दिलं जातंय त्यांची आरटी-पीसीआर चाचणी निगेटिव्ह येण्याचं प्रमाणंही जास्त आहे. त्यामुळे या औषधाकडून लोकांच्या मोठ्या आशा आहेत.

DG-2 हे औषध DRDO नं विकसित केलं असून ते कोरोनावर प्रभावी असल्यानं त्याला कोरोनाच्या रुग्णांवर वापरासाठी नुकतीच परवानगी देण्यात आली होती. त्यासाठी हे औषध आता बाजारातही आलं आहे. पण DRDO नं खास करुन कोरोनासाठी विकसित केलेलं हे औषध नाही, यापूर्वी हे औषध कर्करोगाच्या आजारावरही वापरण्यात आलं आहे, अशी माहिती आयसीएमआरचे महासंचालक बलराम भार्गव यांनी याआधी ही माहिती दिली होती.