हैदराबाद : संरक्षण संशोधन आणि विकास प्रयोगशाळामधील (Defence Research & Development Laboratory, DRDL) अभियंता आयएसआय ऑपरेटिव्ह असल्याचा संशय असलेल्या एका महिलेनं त्याला लग्नाचं आमिष दाखवून भारताच्या क्षेपणास्त्र विकास, तेलंगणातील संवेदनशील माहिती लीक करण्यास भाग पाडलंय, असा पोलिसांनी (Rachakonda Police) दावा केलाय. मल्लिकार्जुन रेड्डी (वय 29) या आरोपीला अटक करण्यात आलीय. नताशा रावच्या नावाखाली भारतीय असल्याचा मुखवटा मिरवणाऱ्या पाकिस्तानी गुप्तहेराशी (ISI) त्याचे संबंध उघड झाल्याने त्याच्यावर ही कारवाई करण्यात आलीय.

मिळालेल्या माहितीनुसार, एलबी नगर झोनच्या विशेष कार्य पथकानं बालापूर पोलिसांसोबत केलेल्या संयुक्त कारवाईत आरसीआय कॉम्प्लेक्समध्ये कार्यरत असलेल्या मल्लिकार्जुन रेड्डीला (Mallikarjuna Reddy) अटक केलीय. DRDL-RCI कॉम्प्लेक्सशी संबंधित गोपनीय माहिती सोशल मीडियाद्वारे एका महिलेसोबत शेअर केल्याचा त्याच्यावर संशय आहे. ज्या महिलेसोबत माहिती लीक केलीय, ती पाकिस्तानची गुप्तचर संस्था ISI ची महिला हँडलर असल्याचा संशय आहे.

मल्लिकार्जुननं बीटेक आणि एमबीए केलं असून डीआरडीएल सोबतच्या कामाबाबतची माहिती त्यानं फेसबुक अकाउंटवरुन शेअर केली होती. नताशा राव असल्याचा दावा करणाऱ्या एका महिलेनं त्याच्याशी संपर्क साधला आणि यूके डिफेन्स जर्नलचा (UK defence journal) कर्मचारी म्हणून स्वत:ची ओळख करून देणार्‍या एका संशयित आरोपीला तिनं आपल्या जाळ्यात अडकवलं. पोलिसांना याबाबतचा संशय आल्यानं त्याला अटक करण्यात आलीय.

सिमरन चोप्रा आणि ओमिशा अदी यांच्यासह इतर नावांनी ओळखल्या जाणार्‍या नताशा रावच्या नंतरच्या संभाषणादरम्यान, मल्लिकार्जुन रेड्डीनं गोपनीय माहिती सामायिक केली आणि त्यांच्या बँक खात्याचे तपशील देखील शेअर केले. पोलिसांनी रेड्डीविरुद्ध अधिकृत गुप्तता कायदा-1923 च्या विविध कलमांतर्गत गुन्हा दाखल केलाय. त्याच्याकडून दोन मोबाईल फोन, एक सिमकार्ड आणि एक लॅपटॉप जप्त करण्यात आलाय.