दिल्लीत आम आदमी पक्षाच्या नेत्यांविरोधात ईडीची कारवाई सुरूच आहे. मंगळवारी ईडीचे पथक आप आमदार अमानतुल्ला खान यांच्या घरावर छापा टाकण्यासाठी ओखला येथे दाखल झाले आहे. मिळालेल्या माहितीनुसार, सकाळी 6.30 वाजता ईडीची टीम त्याच्या घराजवळ पोहोचली आणि जवळपास 7.30 वाजता अंमलबजावणी संचालनालयाचे पथक अमानतुल्ला खान यांच्या घरात घुसले.

मीडिया रिपोर्टनुसार, ईडीने गेल्या वर्षी अमानतुल्ला खान यांच्याविरोधात वक्फ बोर्ड जमीन घोटाळ्याच्या आधारे हा छापा टाकला आहे. लाचलुचपत प्रतिबंधक विभागाने (एसीबी) अमानतुल्ला यांच्यावरही गुन्हा दाखल केला आहे. गेल्या वर्षी एसीबीने दिल्लीतील त्यांच्या संबंधित 5 ठिकाणी छापे टाकले होते. या छाप्यात 12 लाख रुपये रोख, 1 विनापरवाना बेरेटा पिस्तूल आणि 2 वेगवेगळ्या बोअरची काडतुसे जप्त करण्यात आली होती.

काही दिवसांपूर्वी ईडीने आम आदमी पक्षाचे खासदार संजय सिंह यांच्या घरी देखील छापे टाकले होते. येथे धेखील ईडीने काही दस्तावेज जप्त केले होते. दिल्ली मद्य धोरण घोटाळा प्रकरणात संजय सिंह यांच्या ठिकाणांवर हे छापे टाकण्यात आले होते. ईडीने तब्बल आठ तास छापेमारी केली होती.