ED Raid In Kolkata : पश्चिम बंगाल शिक्षक भरती घोटाळा प्रकरणात, अंमलबजावणी संचालनालयाने (ED) शुक्रवारी रात्री टीएमसी पक्षाचे मंत्री पार्थ चॅटर्जी यांच्या जवळची मैत्रीण अर्पिता मुखर्जी यांच्या घरावर ही छापेमारी करण्यात आली आहे. यादरम्यान 20 कोटींहून अधिक रोकड, विदेशी चलन आणि सोने इत्यादी जप्त केल्याचा दावा करण्यात आला आहे. तसेच छापेमारीत अनेक गुन्हे दाखले आणि इलेक्ट्रॉनिक उपकरणे जप्त करण्यात आली आहेत. जप्त केलेले हे पैसे एसएससी घोटाळ्याशी निगडीत असल्याचा संशय ईडीला आहे. कारवाईच्या काही मिनिटांनंतर भाजप नेते सुवेंदू अधिकारी यांनी "ये तो बस ट्रेलर है, पिक्चर अभी बाकी है.. असे म्हणत पक्षावर जोरदार हल्ला चढवला आहे.

छापे टाकण्यात आलेल्यांमध्ये पश्चिम बंगालचे वाणिज्य आणि उद्योग मंत्री पार्थ चॅटर्जी, माजी शिक्षण मंत्री परेश अधिकारी, पश्चिम बंगाल प्राथमिक शिक्षण मंडळाचे माजी अध्यक्ष आणि तत्कालीन शिक्षण मंत्री आमदार माणिक भट्टाचार्य यांचा समावेश आहे. ममता बॅनर्जी यांच्या मंत्रिमंडळात पार्थ चटर्जी सध्या उद्योग आणि वाणिज्य मंत्री आहेत. एसएससी घोटाळा झाला तेव्हा चटर्जी शिक्षणमंत्री होते.

कोलकत्ता उच्च न्यायालयाने अनेक रिट याचिकांमध्ये नुकतेच केंद्रीय अन्वेषण ब्युरोला गट 'क' आणि 'डी' कर्मचारी, नववी-बारावीचे सहाय्यक शिक्षक आणि प्राथमिक शिक्षकांच्या भरती घोटाळ्याची चौकशी करण्याचे निर्देश दिले होते. या प्रकरणांमध्ये, शिक्षकेतर कर्मचारी (गट C आणि D), शिक्षक कर्मचारी [सहाय्यक शिक्षक (वर्ग IX-XII) आणि प्राथमिक शाळेतील शिक्षकांची बेकायदेशीर नियुक्ती याबाबत ED मनी लाँडरिंग प्रतिबंधक कायदा (PMLA) अंतर्गत प्रकरणांची चौकशी करत आहे.